चितवन, असार ११ — राष्ट्रिय स्वतन्त्र पार्टी (रास्वपा) को पहिलो राष्ट्रिय महाधिवेशनमा नयाँ नेतृत्व चयनका लागि भएको मतदानमा अपेक्षाभन्दा कम मत खसेको छ। महाधिवेशनमा सहभागी ४ हजार ३११ प्रतिनिधिमध्ये २ हजार ९५९ जनाले मात्र मतदान गरेका छन् भने १ हजार ३५२ प्रतिनिधि मतदान नगरी फर्किएका छन्।

भरतपुरमा पाँच दिनदेखि जारी महाधिवेशनमा ९९ सदस्यीय केन्द्रीय समितिका लागि ३८४ जना उम्मेदवार प्रतिस्पर्धामा छन्। विद्युतीय मतदान प्रणालीमार्फत मतदान सम्पन्न भएकाले मतपरिणाम छिट्टै सार्वजनिक हुने अपेक्षा गरिएको छ। त्यसपछि पदाधिकारी चयनका लागि दोस्रो चरणको मतदान गरिनेछ।

महाधिवेशनको व्यवस्थापन र निर्वाचन प्रक्रियालाई लिएर उम्मेदवारहरूबीच असन्तुष्टि बढेको छ। निर्वाचन सम्पन्न नहुँदासम्म पनि प्रतिनिधिको अन्तिम सूची टुङ्गो नलागेको भन्दै सहभागीहरूले व्यवस्थापनमाथि प्रश्न उठाएका छन्।

केन्द्रीय सदस्य पदका लागि उम्मेदवारी दिएका केही नेताहरूले निर्वाचनमा योजनाबद्ध चलखेल भएको आरोप लगाएका छन्। उम्मेदवारहरूको क्रम संख्या, समूहगत वर्गीकरण र वर्णानुक्रम परिवर्तन गरी मतदातालाई अन्योलमा पार्ने प्रयास भएको दाबी गरिएको छ। यस विषयमा उनीहरूले सामाजिक सञ्जालमार्फत सार्वजनिक रूपमा असन्तुष्टि व्यक्त गरेका छन्।

पार्टीभित्र गुट–उपगुट निषेध गरिने दाबी गरिए पनि केही समूहले आफ्ना निकट उम्मेदवारको पक्षमा नामावली वितरण गरेको आरोपसमेत सार्वजनिक भएको छ। मध्यरातमा उम्मेदवारहरूको सूची बाँडिएको विषयले पनि महाधिवेशनमा थप विवाद सिर्जना गरेको छ।

यसैबीच, ज्वाला सङ्ग्रौला, आशिका तामाङलगायत केही उम्मेदवारहरूले मतदान यन्त्रमा उम्मेदवारहरूको विवरण परिवर्तन गरी राखिएको आरोप लगाएका छन्। उनीहरूले निर्वाचन प्रक्रियाको निष्पक्षतामाथि प्रश्न उठाउँदै छानबिनको माग गरेका छन्।

मतपरिणाम आउन बाँकी रहेकाले उठेका आरोपबारे पार्टी नेतृत्वको औपचारिक प्रतिक्रिया अझै सार्वजनिक भएको छैन। तर महाधिवेशनको निर्वाचन प्रक्रिया र व्यवस्थापनलाई लिएर उठेका प्रश्नले रास्वपाभित्रको आन्तरिक असन्तुष्टि सतहमा आएको देखिएको छ।