बैंकक — थाइल्यान्डका पूर्व प्रधानमन्त्री थाक्सिन सिनावात्रा भ्रष्टाचार मुद्दामा जेल सजाय भुक्तान गर्दै सोमबार बैंककस्थित जेलबाट पेरोलमा रिहा भएका छन्।

भ्रष्टाचार आरोपमा एक वर्षको सजाय तोकिएका थाक्सिनले करिब आठ महिना जेल जीवन बिताएपछि स्थानीय समय अनुसार बिहानै क्लोङ प्रेम जेल बाट रिहा भएका हुन्।

उनको रिहाइका क्रममा करिब ३०० समर्थक तथा राजनीतिक सहयोगीहरू जेलबाहिर भेला भएका थिए। सेतो पोलो टी–सर्ट र निलो पाइन्टमा देखिएका थाक्सिनलाई परिवारका सदस्यहरूले अँगालो हाल्दै स्वागत गरेका थिए।

समर्थकहरूले ‘वी लभ थाक्सिन’ भन्दै नारा लगाउँदै उनलाई रातो गुलाबसमेत दिएका थिए। तर रिहाइपछि उनले सञ्चारमाध्यमसँग कुनै प्रतिक्रिया दिन चाहेनन्।

थाक्सिन सन् २००१ मा प्रधानमन्त्री बनेका थिए भने सन् २००६ मा सैन्य ‘कू’ मार्फत सत्ता गुमाएका थिए। त्यसपछि उनी लामो समय निर्वासनमा रहे।

उनमाथि शक्तिको दुरुपयोग, सरकारी परियोजनामा अनियमितता र निजी व्यापारलाई फाइदा पुर्‍याएको आरोप लागेको थियो।

सन् २०२३ मा स्वदेश फर्किएपछि अदालतले उनलाई सुरुमा आठ वर्षको जेल सजाय सुनाएको थियो, जसलाई पछि राजा महा वाजिरालोङकोर्न ले एक वर्षमा घटाइदिएका थिए।

स्वास्थ्य कारण देखाउँदै सुरुमा अस्पतालको विशेष कक्षमा राखिएका थाक्सिनलाई पछि सर्वोच्च अदालतको आदेशपछि जेलमै सजाय पूरा गर्न पठाइएको थियो।

उनको रिहाइपछि थाइल्यान्डको राजनीतिक परिदृश्य फेरि चासोको केन्द्रमा पुगेको छ, किनकि उनी लामो समयदेखि देशको ध्रुवीकरणको प्रमुख पात्र मानिन्छन्।