सियोल — पूर्वराष्ट्रपति युन सुक योलले लागू गरेको विवादास्पद मार्सल ल प्रकरणसँग सम्बन्धित मुद्दामा दक्षिण कोरियाको उच्च अदालतले पूर्वप्रधानमन्त्री हान डक–सूको जेल सजाय घटाएको छ।

सियोल उच्च अदालतले बिहीबार सुनाएको फैसलामा हानको कैद सजाय २३ वर्षबाट घटाएर १५ वर्ष कायम गरेको हो। अदालतले उनलाई विद्रोहमा संलग्न भएको आरोपमा दोषी ठहर भने यथावत् राखेको छ।

अदालतका अनुसार हानले तत्कालीन राष्ट्रपति युनका अवैध कदमलाई वैधानिकता दिन सक्रिय भूमिका खेलेका थिए। मन्त्रिपरिषद् बैठकमार्फत मार्सल ल अनुमोदन गराउने प्रक्रिया अघि बढाउनु तथा प्रमुख सञ्चार संस्थाहरूको पानी र बिजुली काट्ने योजनाबारे छलफल गर्नुजस्ता कार्यलाई अदालतले असंवैधानिक कदमलाई संस्थागत गर्ने प्रयासका रूपमा व्याख्या गरेको छ।

यसैगरी, मार्सल ल घोषणासम्बन्धी कागजात झुठो बनाउने, प्रमाण नष्ट गर्ने तथा अदालतमा झूटो बयान दिएको आरोप पनि पुष्टि भएको अदालतले जनाएको छ।

यसअघि सियोल जिल्ला अदालतले उनलाई २३ वर्षको जेल सजाय सुनाएको थियो भने पूर्वराष्ट्रपति युन सुक योललाई पनि विद्रोहको आरोपमा आजीवन कारावासको सजाय सुनाइएको थियो।

विशेष अभियोजकले हानका लागि १५ वर्ष जेल सजाय माग गरेको भए पनि जिल्ला अदालतले कठोर फैसला सुनाएको थियो। तर उच्च अदालतले अन्य उच्च अधिकारीहरूको सजायसँग तुलना गर्दै १५ वर्षको सजाय उपयुक्त ठहर गरेको हो।

हान र सरकारी अभियोजन पक्ष दुवैले अब सर्वोच्च अदालतमा पुनरावेदन गर्न सक्नेछन्। यो प्रकरणले दक्षिण कोरियाली राजनीतिमा गम्भीर संवैधानिक संकट सिर्जना गरेको रूपमा लिइएको छ।