काठमाडौँ । पूर्वप्रधानमन्त्री शेरबहादुर देउवाको पक्राउ पुर्जीविरुद्ध दायर रिट आज सर्वोच्च अदालतमा पेसी चढ्ने भएको छ। रिट न्यायाधीशद्वय महेश शर्मा पौडेल र नित्यानन्द पाण्डेयको इजलासमा सुनुवाइका लागि तोकिएको छ।

यसअघि जेठ ५ गते न्यायाधीश मेघराज पोखरेलको इजलासले उक्त रिटमा प्रारम्भिक सुनुवाइ गर्दै कारण देखाऊ आदेश जारी गरेको थियो। अदालतले सरकारलाई १५ दिनभित्र लिखित जवाफ पेस गर्न आदेश दिएको थियो।

आजको सुनुवाइमा रिटमाथि अन्तरिम आदेश जारी गर्ने वा नगर्ने विषयमा दुवै पक्षको बहस हुने भएको छ। अदालतले यसअघि नै दुवै पक्षलाई उपस्थित हुन निर्देशन दिएको थियो।

देउवाको तर्फबाट दायर रिटमा पक्राउ प्रक्रिया गैरकानुनी र अधिकारविपरीत भएको दाबी गरिएको छ। रिटमा देउवाले अनुसन्धानमा सहयोग गर्न तयार रहेको, सम्पत्तिको स्रोत खुलाउन इच्छुक रहेको र पक्राउ आवश्यक नभएको जिकिर गरिएको छ।

यसैबीच, सम्पत्ति शुद्धीकरण अनुसन्धान विभागले देउवाविरुद्ध काठमाडौँ जिल्ला अदालतबाट पक्राउ अनुमति लिएको बताइएको छ। उनी हाल विदेशमा रहेको पनि स्रोतले जनाएको छ।