अमेरिकी सेनाले चीनलाई ताइवान कब्जा गर्नबाट रोक्नका लागि थप बजेट माग गरेको छ।

चीनसँग सम्भावित युद्धको नेतृत्व गर्ने अमेरिकी इन्डो–प्यासिफिक कमाण्ड का प्रमुख स्यामुअल पपारोले नयाँ युद्धपोत–विनाशक हतियार र उन्नत समुद्री प्रणाली विकासका लागि संसदसँग अतिरिक्त स्रोत माग गरेका छन्।

ब्लुमबर्गका अनुसार संसदमा बुझाइएको १२१ पृष्ठको प्रतिवेदनमा चीनप्रति अघिल्ला अमेरिकी प्रशासनभन्दा कडा भाषा प्रयोग गरिएको छ।

प्रतिवेदनमा चिनियाँ जनमुक्ति सेना ले ताइवानलाई जबरजस्ती एकीकरण गर्ने र अमेरिकी तथा सहयोगी देशहरूको रक्षा क्षमतामाथि चुनौती दिने उद्देश्यसहित तयारी गरिरहेको उल्लेख गरिएको छ। साथै सन् २०२७ सम्म सैन्य तयारी पूरा गर्ने लक्ष्य रहेको दाबी गरिएको छ।

चीनले ताइवानलाई आफ्नो अभिन्न भूभाग मान्दै आएको छ र आवश्यक परे बल प्रयोग गर्ने विकल्प नत्यागेको बताइन्छ। अर्कोतर्फ, अमेरिका लामो समयदेखि ताइवानलाई सैन्य सहयोग र हतियार आपूर्ति गर्दै आएको छ।

ताइवान को राजनीतिक स्थिति लामो समयदेखि विवादित छ, जहाँ चीनले शान्तिपूर्ण एकीकरणको नीति अघि सारेको छ भने अमेरिका ताइवानको सुरक्षामा परोक्ष रूपमा संलग्न रहँदै आएको छ।

यसैबीच, चीनका राष्ट्रपति सी चिनफिङ ले ताइवान मुद्दा गलत रूपमा व्यवस्थापन भए चीन–अमेरिका सम्बन्ध गम्भीर संकटमा पर्न सक्ने चेतावनी दिएका छन्।