तेहरान/अबुधाबी — इरान ले अमेरिकी वायुसेनाको अत्याधुनिक लडाकु विमानले आकस्मिक अवतरण गरेको दाबी गरेको छ।

भारतस्थित इरानी दूतावासले सामाजिक सञ्जाल एक्समार्फत जनाएको अनुसार F-35 Lightning II ओमान सागरमाथि उडानमा रहेका बेला ‘७७००’ इमरजेन्सी कोड प्रसारण गरेको थियो।

उड्डयन क्षेत्रमा ‘७७००’ लाई सामान्य आपतकालीन संकेतका रूपमा प्रयोग गरिन्छ, जसले विमानमा आकस्मिक समस्या उत्पन्न भएको जनाउँछ।

दूतावासका अनुसार सो कोड प्रसारणपछि विमानले आफ्नो मार्ग परिवर्तन गर्दै अल धफरा एयर बेस मा आकस्मिक अवतरण गरेको थियो।

इरानी पोस्टमा पछिल्लो २४ घण्टामा इमरजेन्सी कोड प्रयोग गर्ने यो दोस्रो F-35 घटना भएको दाबीसमेत गरिएको छ।

तर यस घटनाबारे अहिलेसम्म संयुक्त राज्य अमेरिका वा संयुक्त अरब इमिरेट्स तर्फबाट कुनै आधिकारिक पुष्टि वा प्रतिक्रिया सार्वजनिक भएको छैन।

अल धफरा एयर बेस अमेरिकाका लागि मध्यपूर्वमा रणनीतिक रूपमा महत्त्वपूर्ण सैन्य अड्डामध्ये एक मानिन्छ, जहाँ लडाकु विमान र निगरानी प्रणालीहरू तैनाथ छन्।