काठमाडौँ — अमेरिका र इरानबीच जारी तनाव/द्वन्द्व अन्त्य गर्न अमेरिकाले अघि सारेको नयाँ प्रस्तावमाथि इरानले अध्ययन गरिरहेको जनाएको छ।

इरानी विदेश मन्त्रालयका प्रवक्ता इस्माइल बाघेईका अनुसार अमेरिकी प्रस्ताव अहिले समीक्षाधीन अवस्थामा रहेको छ र यसबारे अन्तिम धारणा पाकिस्तानी मध्यस्थकर्तामार्फत जानकारी गराइनेछ।

यसअघि ह्वाइट हाउसले दुवै पक्ष १४ बुँदे समझदारी पत्रको नजिक पुगेको दाबी गरेपछि इरानको यो प्रतिक्रिया आएको हो। अमेरिकी सञ्चारमाध्यम एक्सियोसका अनुसार प्रस्तावित समझदारी पत्रले एक महिनाका लागि वार्ताको खाका तयार गर्नेछ।

प्रस्तावमा इरानको परमाणु संवर्धन रोक्ने, इरानमाथिका आर्थिक प्रतिबन्धहरू हटाउने तथा रणनीतिक रूपमा महत्वपूर्ण ‘स्ट्रेट अफ हर्मोज’मा जहाज आवागमन पुनः सुचारु गर्ने जस्ता बुँदाहरू समेटिएको बीबीसीले उल्लेख गरेको छ।

यता, इरानी संसदको राष्ट्रिय सुरक्षा समितिका प्रवक्ता इब्राहिम रेजाईले अमेरिकी प्रस्तावलाई ‘इच्छाको सूची’ मात्र भएको टिप्पणी गरेका छन्। उनले सामाजिक सञ्जाल एक्समा लेख्दै इरान कडा जवाफ दिन तयार रहेको चेतावनी दिएका छन्।

यसैबीच, अमेरिका र इजरायलले इरानमा सञ्चालन गरिएको ‘अपरेशन एपिक फ्युरी’ सम्पन्न भएको घोषणा गरे पनि नयाँ सम्झौता नभएमा पुनः आक्रमणको जोखिम कायमै रहेको बताइएको छ।

अमेरिकी राष्ट्रपति डोनल्ड ट्रम्पले पछिल्लो २४ घण्टामा इरानसँग सकारात्मक वार्ता भएको दाबी गर्दै सम्झौताको सम्भावना देखिएको बताएका छन्। तर उनले सम्झौता नभए पुनः बमबारी सुरु हुन सक्ने चेतावनी पनि दिएका छन्।

हाल दुवै पक्ष पाकिस्तानी मध्यस्थतामा हुने अर्को चरणको वार्ताको प्रतीक्षामा छन्। तर वार्ताको संकेत देखिए पनि आपसी चेतावनी र तनावपूर्ण बयानबाजी भने जारी नै रहेको छ।