नर्वे भ्रमणका क्रममा भारतीय प्रधानमन्त्री नरेन्द्र मोदी लाई एक नर्वेजियन पत्रकारले सोधेको प्रश्नपछि भारतमा प्रेस स्वतन्त्रता र सरकारको जवाफदेहिताबारे व्यापक बहस सुरु भएको छ।

नर्वेको ‘डागसाभिसेन’ की पत्रकारले ‘स्वतन्त्र प्रेसका प्रश्न किन नलिनुहुन्छ ?’ भनेर सोधेपछि मोदीले कुनै प्रतिक्रिया नदिई कार्यक्रमस्थलबाट बाहिरिएका थिए। त्यस घटनापछि सामाजिक सञ्जालदेखि राजनीतिक वृत्तसम्म चर्चा चुलिएको छ।

यस घटनासँगै भारतमा पत्रकारमाथि दबाब, सरकारी संवादको शैली र प्रेस स्वतन्त्रताको अवस्थाबारे पुनः प्रश्न उठेको छ। विपक्षी नेता राहुल गान्धी ले समेत सरकारको आलोचना गर्दै लोकतान्त्रिक मूल्य कमजोर बन्दै गएको टिप्पणी गरेका छन्।

यसअघि पनि मोदी सरकारमाथि पत्रकार सम्मेलन सीमित गर्ने र प्रश्न छनोट गर्ने अभ्यासको आरोप लाग्दै आएको छ। तर भारतीय पक्षले भने भारतमा संवैधानिक रूपमा प्रेस स्वतन्त्रता सुनिश्चित रहेको दाबी गर्दै आएको छ।

नर्वे विश्वकै शीर्ष प्रेस स्वतन्त्रता भएको देश मानिन्छ, जहाँ यस्तो घटना सार्वजनिक भएपछि अन्तर्राष्ट्रिय रूपमा समेत भारतको लोकतान्त्रिक छविबारे बहस तीव्र बनेको छ।