ओमान को बन्दरगाह सहर खसाब नजिकै छ वटा इरानी कार्गो तथा माछा मार्ने जहाजमा अमेरिकी लडाकु जेटहरूले आक्रमण गर्दा कम्तीमा ६ जना घाइते भएका छन् भने अन्य ६ जना बेपत्ता भएका छन्।

मेहर समाचार एजेन्सी ले शनिबार सार्वजनिक गरेको रिपोर्टअनुसार ती जहाजहरू दक्षिणी होर्मोजगन प्रान्त अन्तर्गत पर्ने बन्दर लेङ्गेह काउन्टीका गाउँलेहरूको स्वामित्वमा रहेका थिए।

काउन्टी गभर्नर फोड मोरादजादेह लाई उद्धृत गर्दै समाचारमा आक्रमणका बेला जहाजमा २० जना रहेको जनाइएको छ। घाइतेहरूलाई स्थानीय अस्पतालमा उपचारका लागि भर्ना गरिएको बताइएको छ।

यसअघि इरना समाचार एजेन्सी ले होर्मोजगन तटीय क्षेत्रमा भएको अर्को अमेरिकी आक्रमणमा कम्तीमा एक जनाको मृत्यु भएको तथा १० जना घाइते भएको जनाएको थियो। आक्रमणपछि मालवाहक जहाजमा आगलागी भएको र थप चार जना बेपत्ता रहेको उल्लेख गरिएको छ।

होर्मुज जलक्षेत्र वरपर बिहीबार र शुक्रबारदेखि इरान र संयुक्त राज्य अमेरिका बीच तनावपूर्ण झडप सुरु भएको जनाइएको छ।

इरानको मुख्य सैन्य कमान्ड खतम अल–अन्बिया केन्द्रीय मुख्यालय ले अमेरिकी सेनाले दुई इरानी जहाजमाथि आक्रमण गरेको आरोप लगाएको छ।

इरानी कमान्डका प्रवक्ता इब्राहिम जोल्फाघारी ले इरानी सेनाले होर्मुजको पूर्वी क्षेत्र तथा चाबहार बन्दरगाह को दक्षिणमा रहेका अमेरिकी सैन्य जहाजहरूलाई लक्षित गरी जवाफी आक्रमण गरेको दाबी गरेका छन्।

उता अमेरिकी सेन्ट्रल कमान्ड ले जारी गरेको विज्ञप्तिमा अमेरिकी नौसैनिक जहाजहरू स्ट्रेट अफ होर्मुज हुँदै गइरहेका बेला इरानबाट अप्रत्याशित आक्रमण भएको र आत्मरक्षाका लागि प्रतिकार गरिएको उल्लेख गरिएको छ।