अमेरिकी राष्ट्रपति डोनाल्ड ट्रम्पले चीनका राष्ट्रपति सी चिनफिङसँग हुने आगामी शिखर सम्मेलनमा इरानसँग सम्बन्धित तनावभन्दा व्यापारिक विषयलाई प्राथमिकता दिइने बताएका छन्।

बेइजिङ प्रस्थानअघि ह्वाइट हाउसमा पत्रकारहरूसँग कुरा गर्दै ट्रम्पले भने, “हामी राष्ट्रपति सीसँग धेरै विषयमा छलफल गर्नेछौँ, तर सबैभन्दा बढी व्यापारको विषयमा कुराकानी हुनेछ।”

उनले इरानसम्बन्धी प्रश्नलाई गौण बनाउँदै अमेरिकाले स्थिति “नियन्त्रणमा राखेको” दाबी गरे। ट्रम्पका अनुसार, “या त सम्झौता हुनेछ, नत्र तिनीहरू कुनै न कुनै रूपमा ध्वस्त हुनेछन्।”

चीन इरानी तेलको प्रमुख खरिदकर्ता भएको र हाल बन्द रहेको स्ट्रेट अफ हर्मुज खोल्न बेइजिङले आह्वान गरिरहेको पृष्ठभूमिमा शिखर वार्तालाई विश्वव्यापी रूपमा महत्वपूर्ण मानिएको छ। तर ट्रम्पले इरान मुद्दा वार्ताको केन्द्रमा नहुने स्पष्ट संकेत दिएका छन्।

दुई देशबीचको छलफलमा व्यापारिक सम्झौता, आर्थिक सम्बन्ध व्यवस्थापन र नयाँ व्यापार संयन्त्र स्थापना गर्ने विषय प्रमुख रहने अपेक्षा गरिएको छ। साथै, हालैको व्यापार युद्धविरामको समयसीमा विस्तार गर्ने सम्भावनाबारे पनि वार्ता हुने बताइएको छ।

यसैबीच, शिखर वार्ताको तयारीस्वरूप अमेरिकी अर्थमन्त्री स्कट बेसेन्ट र चीनका उपप्रधानमन्त्री हे लिफेङको नेतृत्वमा व्यापार वार्ताकारहरू दक्षिण कोरियाको सियोलमा छलफलमा जुटेका छन्। उनीहरूले तयार पारेको प्रारम्भिक सहमतिको खाकामा नै ट्रम्प र सीबीच अन्तिम सहमति हुने अपेक्षा गरिएको छ।