प्रजातान्त्रिक गणतन्त्र कङ्गो मा इबोला भाइरसको प्रकोपका कारण कम्तीमा १३१ जनाको मृत्यु भएको छ। स्थानीय अधिकारीहरूका अनुसार हालसम्म ५१३ भन्दा बढी व्यक्तिमा संक्रमणको आशंका गरिएको छ।

कङ्गो सरकारका प्रवक्ताले इबोलाको संक्रमण तीव्र गतिमा नयाँ र फराकिलो क्षेत्रहरूमा फैलिरहेको बताएका छन्। विश्व स्वास्थ्य संगठन ले ‘बुन्डिबुग्यो’ भाइरसका कारण फैलिएको इबोलाको यो प्रजातिलाई अन्तर्राष्ट्रिय चासोको सार्वजनिक स्वास्थ्य आपतकाल घोषणा गरेको छ।

यो प्रकोप कङ्गोको छिमेकी युगान्डा सम्म फैलिएको छ। अमेरिकी रोग नियन्त्रण तथा रोकथाम केन्द्रका अनुसार युगान्डामा दुई जनामा संक्रमण पुष्टि भएको छ भने एक जनाको मृत्यु भएको छ।

कङ्गोको इतुरी प्रान्तको न्याकुन्डे, उत्तर किभुको बुटेम्बो र गोमा लगायतका नयाँ सहरहरूमा संक्रमण देखिएपछि सर्वसाधारणमा त्रास बढेको छ। यद्यपि, कङ्गो सरकारले संक्रमितहरूको पहिचान र खोजीका लागि विशेष टोलीहरू दिनरात खटिएको भन्दै नागरिकलाई आतङ्कित नहुन आग्रह गरेको छ।

यसैबीच, कङ्गोमा स्वास्थ्य सेवामा खटिएका अमेरिकी चिकित्सक पिटर स्टाफर्ड पनि इबोलाबाट संक्रमित भएका छन्। ‘सर्ज’ नामक मेडिकल मिसनरी समूहका अनुसार उनलाई थप उपचारका लागि जर्मनी लैजाने तयारी भइरहेको छ।

उनकी श्रीमती रिबेका स्टाफर्ड सहित बिरामीको उपचारमा संलग्न अन्य दुई चिकित्सकलाई उच्च निगरानीमा क्वारेन्टाइनमा राखिएको छ। उनीहरूमा हालसम्म संक्रमणको कुनै लक्षण नदेखिएको जनाइएको छ।

विभिन्न सञ्चारमाध्यमका अनुसार यस प्रकोपका क्रममा कम्तीमा ६ जना अमेरिकी नागरिकहरू इबोला भाइरसको प्रत्यक्ष जोखिममा परेका छन्। अमेरिकी सरकारले उनीहरूलाई सुरक्षित रूपमा उद्धार गरी जर्मनीस्थित अमेरिकी सैन्य शिविरको क्वारेन्टाइनमा राख्ने योजना बनाएको बताइएको छ।