काठमाडौं, जेठ १६ — इजरायली सेनाले दक्षिणी लेबनानका सात गाउँका बासिन्दाहरूलाई लक्षित गर्दै शनिबार नयाँ निकासी आदेश जारी गरेको छ। इजरायल र लेबनानबीच युद्धविराम कायम रहेको दाबी गरिए पनि सीमा क्षेत्रमा तनाव र आक्रमणहरू निरन्तर जारी छन्।

यो आदेश दुई देशका सैन्य प्रतिनिधिमण्डलबीच वासिङ्टनमा भएको सुरक्षा वार्ताको एक दिनपछि आएको हो। लेबनानी राष्ट्रपति जोसेफ आउन ले अमेरिकी विदेशमन्त्री मार्को रुबियो सँगको टेलिफोन संवादमा युद्धविराम कार्यान्वयनका लागि सबै पक्षले प्रयास गर्नुपर्नेमा जोड दिएका छन्।

इजरायल र इरान समर्थित हेजबुल्लाह बीचको द्वन्द्व रोक्न अप्रिल १७ देखि युद्धविराम लागू गरिएको भए पनि दुवै पक्षले एकअर्कामाथि उल्लङ्घनको आरोप लगाउँदै आएका छन्।

इजरायली सेनाको पछिल्लो चेतावनीमा नबातीह आसपासका गाउँहरू समावेश छन्। यता हेजबुल्लाहले उत्तरी इजरायलको किर्यात शमोना क्षेत्रमा रकेट प्रहार गरेको दाबी गरेको छ। समूहले दक्षिणी लेबनानको घन्डोरीयेह नजिक इजरायली सैनिकमाथि आक्रमण गरी पछि हट्न बाध्य पारेको तथा उत्तरी इजरायलस्थित एक सैन्य अड्डालाई पनि निशाना बनाएको जनाएको छ।

इजरायली सेनाले शुक्रबार लेबनानबाट प्रहार गरिएका धेरै प्रोजेक्टाइल अवरुद्ध गरेको पुष्टि गरेको थियो। तीमध्ये एक किर्यात शमोना नजिक खसेको बताइएको छ। हेजबुल्लाहले मध्ययुगीन ब्युफोर्ट किल्ला नजिक अघि बढ्न खोजेका इजरायली सैनिकमाथि पनि आक्रमण गरेको जनाएको छ।

यसैबीच, इजरायल र लेबनानबीच अप्रिलमा सुरु भएको प्रत्यक्ष वार्ताको चौथो चरण अर्को साता वासिङ्टनमा हुने अपेक्षा गरिएको छ। पेन्टागनमा शुक्रबार सम्पन्न बैठकलाई यस प्रक्रियाको महत्वपूर्ण चरणका रूपमा हेरिएको छ।

लेबनानको स्वास्थ्य मन्त्रालयका अनुसार दक्षिणी सहर टायरमा शुक्रबार भएको इजरायली आक्रमणमा ११ जनाको मृत्यु भएको छ। मन्त्रालयले मार्च २ यता इजरायली आक्रमणबाट कम्तीमा तीन हजार ३५५ जनाको ज्यान गएको जनाएको छ।

युद्धका कारण दक्षिणी लेबनानबाट सयौं स्थानीय बासिन्दा तथा पर्यटक विस्थापित भएका छन्। पुरानो सहर टायरमा आश्रय लिनेहरूको संख्या बढेपछि धेरै मानिस कार तथा अस्थायी शिविरमा बस्न बाध्य भएका छन्।

हेजबुल्लाहले अमेरिकी मध्यस्थतामा भइरहेको वार्ताप्रति असन्तुष्टि जनाउँदै निशस्त्रीकरण स्वीकार नगर्ने अडान दोहोर्‍याएको छ। यसबीच, लेबनानको राष्ट्रिय समाचार एजेन्सीले दक्षिणी क्षेत्रमा २० भन्दा बढी स्थानमा इजरायली हवाई आक्रमण भएको जनाएको छ।

क्षेत्रीय तनाव बढ्दै जाँदा युद्धविरामको भविष्य र कूटनीतिक प्रयासको सफलतामाथि थप प्रश्न उठ्न थालेका छन्।