इस्लामाबाद — पाकिस्तानी सरकारले नूर खान एयरबेस मा इरानी सैन्य विमान उपस्थित रहेको भन्दै विभिन्न सञ्चार माध्यममा आएका समाचारलाई कडा रूपमा अस्वीकार गरेको छ।

पाकिस्तानको विदेश मन्त्रालयले मंगलबार जारी गरेको विज्ञप्तिमा ती विमानहरू सैन्य उद्देश्यका लागि नभई कूटनीतिक प्रयोजनका लागि आएको स्पष्ट पारेको छ। मन्त्रालयका अनुसार हालैको युद्धविरामपछि र इस्लामाबादमा जारी प्रारम्भिक वार्ताका क्रममा कूटनीतिक कर्मचारी, सुरक्षा टोली तथा वार्ता प्रक्रियासँग सम्बन्धित प्रशासनिक व्यक्तिहरूलाई ओसारपसार गर्न ती विमानहरू पाकिस्तान पुगेका हुन्।

वक्तव्यमा भनिएको छ कि केही विमान र सम्बन्धित सहयोगीहरू अस्थायी रूपमा पाकिस्तानमा रहेका भए पनि उनीहरूको उपस्थिति पूर्ण रूपमा कूटनीतिक प्रयोजनसँग सम्बन्धित छ।

विदेश कार्यालयले थप स्पष्ट पार्दै भनेको छ कि औपचारिक वार्ता रोकिए पनि युद्धरत पक्षहरूबीच कूटनीतिक सम्पर्क जारी रहेको र नूर खान एयरबेसमा रहेका विमानहरू इरानी विदेश मन्त्रीको भ्रमणसँग सम्बन्धित कूटनीतिक समन्वयका लागि प्रयोग गरिएको हो।

सरकारले ती विमानहरू कुनै पनि सैन्य आपतकालीन अवस्था वा सुरक्षा तयारीसँग सम्बन्धित रहेको दाबीलाई “पूर्ण रूपमा गलत र तथ्यहीन” भन्दै अस्वीकार गरेको छ।

यसैबीच पाकिस्तानले क्षेत्रीय शान्ति, तनाव न्यूनीकरण तथा स्थिरताको पक्षमा आफ्नो प्रतिबद्धता दोहोर्‍याएको छ। साथै कूटनीतिक संवादलाई निरन्तरता दिनुपर्नेमा जोड दिएको छ।