बालेन शाहको पुरानो र्याप भिडियोबारे साइबर ब्यूरोमा उजुरी, छानबिनको माग
प्रधानमन्त्री वालेन्द्र शाह (बालेन) को पुरानो र्याप भिडियोलाई लिएर साइबर ब्यूरोमा उजुरी दर्ता गरिएको छ।
उजुरीमा उक्त भिडियोका केही शब्द र सन्देशले महिला तथा लैङ्गिक र यौनिक अल्पसंख्यक (जीएसएम) समुदायप्रति आपत्तिजनक भावना फैलाएको, घृणा अभिव्यक्ति गरेको तथा हिंसा सम्बन्धी सन्देश समेटिएको दाबी गरिएको छ।
उजुरी दर्ता गर्नेहरूमा जीएसएम समुदायका सक्रिय सदस्यहरू पवन राई (बाबु दुमी), विवेक मगर, मनिन्द्र सिंह दनुवार र रोजी पुन छन्।
उनीहरूले सार्वजनिक पदमा रहेका व्यक्तिको विगतका अभिव्यक्ति र सामग्रीप्रति जवाफदेहिता आवश्यक हुने भन्दै आवश्यक छानबिनको माग गरेका छन्।
बालेनको उक्त भिडियो सामग्रीले समुदायभित्र गम्भीर चिन्ता उत्पन्न गरेको छ। यसैबीच, साइबर ब्यूरोले भिडियो हटाउने विषयमा आवश्यक पहल गर्ने मौखिक आश्वासन दिएको उजुरीकर्ताहरूले बताएका छन्।
उजुरीकर्ताहरूले अब प्रक्रिया कति छिटो र प्रभावकारी रूपमा अघि बढ्छ भन्ने कुरा महत्वपूर्ण हुने बताएका छन्।
