सरकारले साताको दुई दिन सार्वजनिक बिदा दिने निर्णय गरेसँगै स्वास्थ्य क्षेत्रमा पनि शनिबार र आइतबार बिदा हुने भएको छ । स्वास्थ्य तथा जनसंख्या मन्त्रालयले राजपत्रमा प्रकाशित सूचनालाई कार्यान्वयन गर्दै स्वास्थ्यकर्मीहरूको मनोबल र हितलाई ध्यानमा राखेर यो व्यवस्था मिलाइएको जनाएको छ ।

तर बिदाको समयमा पनि बिरामीको उपचारमा कुनै अवरोध नहोस् भन्नका लागि मन्त्रालयले आकस्मिक र अन्तरङ्ग सेवाहरूलाई भने पहिले झैँ चौबिसै घण्टा सुचारु राख्ने सुनिश्चित गरेको छ ।

शुक्रबार विज्ञप्ति जारी गर्दै मन्त्रालयले आइतबारका लागि पहिले नै तय भइसकेका शल्यक्रियाहरू बिरामीको सुविधा र अवस्थालाई विचार गर्दै नयाँ समयमा सारिने जनाएको छ ।

बिदाका दिनमा अस्पताल पुग्ने बिरामीले सास्ती भोग्नु नपरोस् भन्ने हेतुले मन्त्रालयले अस्पतालहरूलाई सम्भव भएसम्मका सेवाहरू उपलब्ध गराउन र आफ्ना तर्फबाट सेवा दिन नसकिएको खण्डमा नजिकैको अर्को अस्पतालमा सहजै रेफर गर्ने प्रबन्ध मिलाउन निर्देशन दिएको मन्त्रालयका प्रवक्ता डा. प्रकाश बुढाथोकीले जारी गरेको विज्ञप्तिमा उल्लेख छ ।