लेबनानमा तैनाथ संयुक्त राष्ट्रसंघीय शान्ति सेना (युनिफिल) माथि आक्रमण हुँदा एक सैनिकको ज्यान गएको छ । ज्यान गुमाउने सैनिक फ्रान्सेली रहेको अल जजीराले जनाएको छ । आक्रमणमा अरु तीन जना घाइते भएका छन् ।

फ्रान्सेली राष्ट्रपति इमानुएल म्याक्रोंले सामाजिक सञ्जाल एक्समार्फत घटनाको पुष्टि गरेका हुन् । म्याक्रोंले आक्रमणमा लेबनानी सशस्त्र समूह हेज्बोल्लाहको संलग्नता रहेको सङ्केत गर्दै दोषीहरूलाई तत्काल पक्राउ गर्न लेबनानी अधिकारीहरूसँग माग गरेका छन् ।

प्राप्त प्रमाणहरूले हिजबुल्लाह नै यस घटनाका लागि जिम्मेवार रहेको उनले दाबी गरेका छन् । यसैबीच लेबनानका प्रधानमन्त्री नवाफ सलामले फ्रान्सेली शान्ति सैनिकमाथि भएको यस आक्रमणको कडा शब्दमा निन्दा गरेका छन् ।

उनले घटनाको संवेदनशीलतालाई ध्यानमा राख्दै तत्काल छानबिन गर्न निर्देशन समेत दिएका छन् । लेबनानमा युद्धविराम भएको केही समयपछि एक फ्रान्सेली सैनिकको ज्यान जानेगरी भएको शान्ति सैनिकमाथिको हमलापछि अनिश्चितता बढेर गएको छ ।