सुधन गुरुङले गृहमन्त्रीबाट राजीनामा दिँदा सभापति रवि लामिछानेलाई नै झस्काउने शब्द सामाजिक सञ्जालमा प्रयोग गरेका छन् ।

गुरुङले सामाजिक सञ्जाल फेसबुकमा भनाइ राख्दै ‘कति मिडियाकर्मी साथीहरूको कहाँ-कहाँ स्वेट सेयर छ, बिस्तारै आउला, रामराज्यको चाहना राख्नेहरूले त्याग र नैतिक साहस पनि देखाउन सक्नुपर्छ’, भनेर लेखेका छन् ।

रास्वपा सभापति लामिछाने नै विभिन्न सहकारीको करोडौँ बचत अपचलन गरेको गोर्खा मिडिया नेट्वर्कका १५ प्रतिशत सेयर स्वामित्व भएका व्यक्ति हुन् ।

ओखलढुंगाका गितेन्द्रबाबु (जीबी) राई नेतृत्वमा उक्त मिडियाले सहहकारीबाट अवैधानिक रुपमा ल्याएर गरेको ठूलो रकम अपचलनपछि लामिछानेले सहकारी ठगी र सम्पत्ति शुद्धीकरणको मुद्दा खेप्दै आएका छन् ।

व्यवसायी दीपक भट्टसँग साझेदार सेयर रहेको प्रमाण सार्वजनिक भइसक्दा गृहमन्त्रीको भूमिकामा रहेका गुरुङले राजीनामा दिन खोजेका थिएनन् । बरू उनले सामाजिक सञ्जालमा भनाइ राख्दै ‘मिडिया ट्रायल’ र प्रायोजित हल्ला भएको टिप्पणी गरेका थिए ।

तर, पटक–पटक पार्टी सभापति लामिछाने र प्रधानमन्त्री वालेन्द्र शाहसँगको भेटपछि राजीनामा दिन बाध्य भएका गुरूङले मुद्दा खेपिरहेका सभापति लामिछानेप्रति पनि इंगित गर्नेगरी आममिडियालाई शाब्दिक प्रहार गरेका हु्न्।

यसअघि रविले सुधनलाई गृहमन्त्रीमा पनि रोक्न खोजेका थिए । बालेनले सुधनलाई अघि सारेपछि रवि सकारात्मक थिएनन्। बालेनले निर्णय गरिसकेको जवाफ दिएपछि रवि मौन बस्न बाध्य भएका थिए ।

रविले आफूनिकट दीपक बोहरालाई गृहमन्त्रालयमा पठाउन चाहेका थिए । बालेनले रविको कोर टीमका दीपक बोहरालाई अस्वीकार गरेपछि सुनिल लम्साल र विक्रम तिमल्सिनासँग छलफल भएको थियो ।

तर उनीहरूले पुराना दलका नेताहरूलाई तत्कालै पक्राउ गरेर मुद्दा चलाउन आनाकानी गरे । त्यसपछि बालेन आफैं सुधनलाई नेताहरू समात्न र सरकारको अभियानलाई तीव्रता दिन तयार भए गृहमन्त्री दिने भनेर सुधनलाई सरकारमा ल्याएका थिए ।