काठमाडौं। प्रतिनिधिसभाको उपसभामुख निर्वाचनका क्रममा प्रमुख प्रतिपक्षी नेपाली कांग्रेसले श्रम संस्कृति पार्टीकी उम्मेदवार रुबीकुमारी ठाकुरलाई समर्थन गर्ने घोषणा गरेको छ।

शुक्रबार उपसभामुख चयन प्रक्रिया अघि बढ्दै गर्दा प्रतिनिधिसभा बैठकमा बोल्दै कांग्रेस सांसद बासना थापालले पार्टीको औपचारिक निर्णय सार्वजनिक गरेकी हुन्। उनका अनुसार कांग्रेसले रुबीकुमारी ठाकुरको पक्षमा उभिने निर्णय गरेको छ।

‘प्रमुख प्रतिपक्षीका रूपमा नेपाली कांग्रेसले श्रमसंस्कृतिकी रुबीकुमारी ठाकुरको पक्षमा उभिने निर्णय गरेको छ,’ उनले संसद्मा भनिन्, ‘तर कांग्रेसले रास्वपा नेतृत्वको सरकारलाई प्रतिपक्षीका रूपमा खबरदारी गर्ने भूमिकाबाट आफूलाई विचलित गराउने छैन।’

थापालले कांग्रेस संसद् र सडक दुवै ठाउँबाट जिम्मेवार प्रतिपक्षीका रूपमा सरकारलाई निरन्तर निगरानी र खबरदारी गरिरहने बताइन्।

उपसभामुख निर्वाचनमा सत्ता–प्रतिपक्षबीचको समीकरण र समर्थनले संसद्को आगामी कार्यगत राजनीतिक समन्वयमा प्रभाव पार्ने अनुमान गरिएको छ।