असार १५ — अमेरिका र इरानबीच एकअर्कामाथि आक्रमण रोक्ने सहमति भएको छ। एक अमेरिकी अधिकारीका अनुसार मध्यपूर्वमा जारी द्वन्द्व अन्त्य गर्ने उद्देश्यसहित वार्ता निरन्तर अघि बढाइनेछ।

जुन १७ मा भएको संवेदनशील समझदारीपत्रका बाबजुद पछिल्ला दिनमा दुवै देशका सेनाबीच आक्रमण आदानप्रदान भएको थियो। फेब्रुअरी अन्त्यतिर सुरु भएको यो द्वन्द्वले महत्वपूर्ण हर्मुज जलडमरु हुँदै हुने अन्तर्राष्ट्रिय ढुवानीमा असर पारेको थियो।

समझदारीअनुसार इरानले व्यावसायिक जहाजलाई जलडमरुबाट सुरक्षित आवतजावत गर्न दिने र अमेरिकाले इरानी बन्दरगाहमाथिको नाकाबन्दी हटाउने सहमति भएको बताइएको छ।

अधिकारीका अनुसार दुवै पक्षले तत्कालका लागि आक्रमण रोक्ने र प्राविधिक वार्ता जारी राख्ने सहमति गरेका छन्। वार्ता कहिले र कहाँ हुने भन्ने औपचारिक विवरण भने सार्वजनिक गरिएको छैन। तर अमेरिकी सञ्चारमाध्यमका अनुसार वार्ता मंगलबार कतारको दोहामा पुनः सुरु हुने सम्भावना छ।

यसबीच, अमेरिकी राष्ट्रपति डोनाल्ड ट्रम्पले इरानले आक्रमण जारी राखे सैन्य कारबाही गर्न बाध्य हुने चेतावनी दोहोर्‍याएका छन्।

यसअघि पाकिस्तानको मध्यस्थतामा भएको समझदारीपछि पनि दुवै पक्षले एकअर्कालाई युद्धविराम उल्लङ्घन गरेको आरोप लगाउँदै आक्रमण गरेका थिए। पछिल्ला झडपमा दुवै पक्षले एकअर्काका सैन्य तथा रणनीतिक लक्ष्यमा आक्रमण गरेको दाबी गरेका छन्।

हालको सहमतिसँगै मध्यपूर्वमा तनाव केही हदसम्म कम हुने अपेक्षा गरिएको छ।