स्पेनमा दुई तीव्र गतिको रेल ठोक्किँदा १० जनाको मृत्यु
स्पेनमा दुई तीव्र गतिको रेल आपसमा ठोक्किँदा कम्तीमा १० जनाको मृत्यु भएको छ। बुधबार टोलेडो क्षेत्रमा भएको दुर्घटनामा धेरै यात्रु घाइते भएको आशंका गरिएको छ। दुर्घटनाको विस्तृत विवरण आउन बाँकी छ।
सरकारी अधिकारीहरूले दुर्घटना भयावह रहेको जनाउँदै मृतकको संख्या बढ्न सक्ने बताएका छन्। दुर्घटना कसरी भयो भन्ने विषयमा भने अझै स्पष्ट जानकारी सार्वजनिक भएको छैन।
स्पेनका प्रधानमन्त्री पेद्रो सान्चेजले दुर्घटनाप्रति दुःख व्यक्त गर्दै घटनाको खबरले आफू स्तब्ध भएको बताएका छन्। उनले घटनास्थलमा आपत्कालीन सेवाका कर्मचारीहरू उद्धार तथा राहत कार्यमा खटिएको जानकारी पनि दिएका छन्।
प्राप्त विवरणअनुसार, दुर्घटना राजधानी म्याड्रिडबाट करिब १४० किलोमिटर दक्षिणमा पर्ने उर्दा सहरनजिक भएको हो। म्याड्रिडबाट देशको दक्षिणी भागतर्फ गइरहेको तीव्र गतिको रेल अर्को रोकिराखेको रेलसँग ठोक्किँदा दुर्घटना भएको जनाइएको छ।
ठक्करका कारण कम्तीमा दुईवटा रेलका डिब्बा रेलमार्गबाट तल भिरालो भागमा खसेका छन्। दुर्घटनापछि घटनास्थलमा अग्निनियन्त्रक, एम्बुलेन्सकर्मी तथा अन्य आपत्कालीन उद्धार टोली परिचालन गरिएको छ। उद्धार कार्यका लागि तीनवटा हेलिकोप्टरसमेत प्रयोग गरिएको जनाइएको छ।
दुर्घटनामा परेको एउटा रेलमा सवार यात्रुले स्थानीय सञ्चारमाध्यमलाई बताएअनुसार यात्रा सुरु भएको करिब ४० मिनेटपछि ठूलो ठक्कर लागेको थियो।
प्रारम्भिक आकलनअनुसार रेलको सङ्केत प्रणालीसँग सम्बन्धित मानवीय त्रुटि दुर्घटनाको सम्भावित कारण हुन सक्ने बताइएको छ। यद्यपि, दुर्घटनाको वास्तविक कारण पुष्टि हुन बाँकी छ।
दुवै रेलमा गरी ५०० भन्दा बढी यात्रु सवार रहेको जनाइएको छ। उद्धार कार्य जारी रहेकाले मृतक तथा घाइतेको संख्या थप बढ्न सक्ने अधिकारीहरूले बताएका छन्।
