इरानसँग दोस्रो चरणको शान्ति वार्ताका लागि अमेरिकी उपराष्ट्रपति जेडी भान्स बुधबार मात्रै पाकिस्तानको राजधानी इस्लामावाद पुग्ने भएका छन् । दुई देशबीच मध्यस्थतामा संलग्न पाकिस्तानी स्रोतलाई उद्धृत गर्दै अल जजीराले भान्स बुधबार मात्रै इस्लामााद पुग्ने जनाएको हो ।

उनी पाकिस्तानी समय अनुसार मंगलबार अबेर वासिङ्टन डीसीबाट इस्लामावादका लागि प्रस्थान गर्ने जनाइएको छ । यस अनुसार उनी बुधबार दिउँसोसम्म इस्लामावाद पुग्नेछन् ।

भान्ससँगै पहिलो चरणको शान्ति वार्ताझैँ राष्ट्रपति डोनाल्ड ट्रम्पका प्रतिनिधिका रुपमा स्टिभ विटकफ र जारेड कुश्नर पनि पाकिस्तान जाने अपेक्षा गरिएको छ । वार्ताको तयारीका लागि केही अमेरिकी सैन्य विमानहरू यसअघि नै पाकिस्तानमा अवतरण गरिसकेका छन् ।

तर, इरानको टोली आउने वा नआउने भन्ने कुरा अझै निश्चित छैन । मंगलबार इरानका संसदका सभामुख र वार्ता टोलीका प्रमुख मोहम्मद बघेर कलिबाफले धम्कीको छायामा वार्ता स्वीकार नगर्ने बताएका छन् । यसले गर्दा दोस्रो चरणको शान्ति वार्ता हुनेमा आशंका अझै कायम छ ।