नेपाल पत्रकार महासंघले तीन तहका सरकारी विज्ञापन सरकारी सञ्चारमाध्यमलाई मात्र दिने सरकारको निर्णयविरुद्ध प्रधानमन्त्रीलाई ज्ञापनपत्र बुझाएको छ।

बिहीबार महासंघले काठमाडौंसहित देशभरका जिल्ला शाखामार्फत प्रमुख जिल्ला अधिकारीहरूद्वारा प्रधानमन्त्रीसमक्ष ज्ञापनपत्र पेश गरेको हो।

महासंघले उक्त निर्णय विभेदकारी भएको भन्दै दबाबमूलक अभियान सञ्चालन गरिरहेको छ। उसका अनुसार निर्णय प्रेस तथा अभिव्यक्ति स्वतन्त्रताको अन्तर्राष्ट्रिय मापदण्ड, नेपालको संवैधानिक व्यवस्था, खुला अर्थनीति र संघीयताको मर्मविपरीत छ।

वैशाख १५ देखि दबाबमूलक कार्यक्रम घोषणा गरिएको महासंघले माग सम्बोधन नभए थप आन्दोलनका कार्यक्रम ल्याउने चेतावनी दिएको छ।