वाशिङ्टन — संयुक्त राज्य अमेरिका ले इरान सँगको युद्धका क्रममा ठूलो मात्रामा टमहक क्रूज मिसाइल प्रयोग गरेको खुलेको छ, जसले अमेरिकी हतियार भण्डारमा दबाब बढाएको छ।

वाशिङ्टन पोस्ट का अनुसार चार हप्ताको अवधिमा ८५० भन्दा बढी टमहक मिसाइल प्रहार गरिएको थियो। युद्धअघि अमेरिकी नौसेनासँग करिब ४,००० मिसाइल रहेको अनुमान गरिए पनि निरन्तर आक्रमणका कारण यसको करिब एक चौथाइ हिस्सा सकिएको बताइएको छ।

दक्षिण इरानस्थित एक विद्यालयमा गरिएको आक्रमणमा १८५ बालबालिकाको ज्यान गएको घटना पनि यही मिसाइलसँग सम्बन्धित रहेको उल्लेख गरिएको छ, जसले अन्तर्राष्ट्रिय स्तरमा चिन्ता बढाएको छ।

रक्षा मन्त्रालयभित्र समेत मिसाइलको तीव्र खपतप्रति चिन्ता बढ्दै गएको जनाइएको छ। एउटा टमहक मिसाइल उत्पादन गर्न करिब दुई वर्ष लाग्ने र यसको लागत झण्डै ३४ करोड रुपैयाँ पर्ने भएकाले पुनः भण्डारण गर्न लामो समय लाग्ने विज्ञहरूले बताएका छन्।

युद्धसँग सम्बन्धित केही प्रमुख शब्दहरू पनि चर्चामा आएका छन्। होर्मुज स्ट्रेट इरान र ओमानबीचको रणनीतिक समुद्री मार्ग हो भने ‘शाहेद’ नामका सस्ता ड्रोनहरू इरानले प्रयोग गर्ने कामिकाजे प्रविधिका उदाहरण हुन्।

त्यस्तै ‘अयातुल्लाह’ शिया इस्लाममा उच्च धार्मिक पद हो, जसले इरानको राजनीतिक–धार्मिक संरचनामा महत्वपूर्ण भूमिका खेल्छ।

विश्लेषकहरूका अनुसार दीर्घकालीन युद्धले हतियार आपूर्ति, लागत र रणनीतिक सन्तुलनमा गम्भीर प्रभाव पार्न सक्ने संकेत देखिएको छ।