बुल्गेरियाका पूर्वराष्ट्रपति रुमेन राडेभले आगामी अप्रिल १९ मा हुने मध्यावधि संसदीय निर्वाचनमा भाग लिन आफ्नो गठबन्धन दर्ता गरेको घोषणा गरेका छन्। राडेभको समूह पाँच वर्ष यता भएको आठौँ मतदानमा शीर्ष स्थानमा रहेको बताइएको छ।

डिसेम्बरमा कन्जरभेटिभ नेतृत्वको सरकार भ्रष्टाचार विरोधी प्रदर्शनले हटाएपछि राजनीतिक अनिश्चितता सिर्जना भएको थियो। राडेभले करिब १० वर्षपछि राष्ट्रपति पदबाट राजीनामा दिने घोषणा गरेका थिए।

६२ वर्षीय राडेभले फेसबुकमार्फत् घोषणा गर्दै भने, “आज हामीले संसदीय चुनावमा भाग लिन प्रोग्रेसिभ बुल्गेरिया गठबन्धन केन्द्रीय निर्वाचन आयोगमा दर्ता गरेका छौँ। हाम्रो गठबन्धनले ‘कुलीन र भ्रष्ट मोडेललाई भत्काउने’ र ‘स्वतन्त्रता, एकता, न्याय तथा बुल्गेरियालाई आधुनिक लोकतान्त्रिक युरोपेली राज्यको रूपमा विकासको लागि’ आह्वान गर्नेछ।”

फेब्रुअरीमा प्रकाशित सर्वेक्षणले राडेभको तीन पार्टी गठबन्धन पहिलो स्थानमा आउन सक्ने संकेत देखाएको छ। सर्वेक्षण अनुसार गठबन्धनले करिब एक तिहाइ मत जित्ने प्रक्षेपण गरिएको छ।

राडेभ पहिलो पटक २०१६ मा राष्ट्रपति निर्वाचित भएका थिए र २०२१ मा दोस्रो कार्यकाल जितेका थिए। उनका समर्थकहरूले भ्रष्टाचार विरोधी प्रदर्शनमा उनको भूमिका उच्च मूल्याङ्कन गरेका थिए।

युक्रेनमा सैन्य सहायताबारे प्रश्न उठाउँदै राडेभले जर्मन दैनिक बर्लिनर जाइटुङसँगको अन्तर्वार्तामा कूटनीतिक उपायमा अझ बढी ध्यान दिनुपर्ने बताउनुभएको छ। उनले भने, “अहिलेसम्म हामीले सबै कूटनीतिक उपाय अपनाएनौँ, मुख्यतया सैन्य र आर्थिक सहयोगमा ध्यान केन्द्रित गरेका छौँ।”