सर्लाही — सर्लाहीको एक मतदान केन्द्रमा विवादपछि केही समयका लागि मतदान स्थगित गरिएको छ।

बलरा नगरपालिका–१, सर्लाही, नेपालस्थित मतदान केन्द्रमा नेपाली कांग्रेस र राष्ट्रिय स्वतन्त्र पार्टीका राजनीतिक प्रतिनिधिबीच विवाद भएपछि स्थिति तनावग्रस्त बनेको हो। विवादका क्रममा दुवै पक्षबीच सामान्य झडपसमेत भएको स्रोतले जनाएको छ।

उक्त मतदान केन्द्र अमरेश कुमार सिंहले मतदान गर्ने बुथ भएको बताइएको छ। उनी राष्ट्रिय स्वतन्त्र पार्टीका तर्फबाट उम्मेदवार हुन्।

विवादपछि केही समयका लागि मतदान प्रक्रिया स्थगित गरिएको छ।

रास्वपाका एक नेताका अनुसार कांग्रेस र रास्वपाका प्रतिनिधिबीच केही विषयमा सहमति नजुटेपछि सामान्य झडप भएको हो। “झडप भएपछि केही समयका लागि मतदान स्थगित भएको छ, अहिले मिलाउने काम भइरहेको छ,” उनले भने, “कांग्रेससँग केही कुरा नमिलेपछि सामान्य झडप भएको हो, अरु विवरण खुल्न बाँकी छ।”