तेहरान । इरान ले आफ्नो मजीद एयर डिफेन्स सिस्टम प्रयोग गरी अमेरिकाको सबैभन्दा उन्नत र अदृश्य मानिने एफ–३५ लडाकु विमानलाई खसालेको दाबी गरेको छ। इरानी सञ्चारमाध्यम प्रेस टीभी अनुसार इस्लामिक रिभोलुसनरी गार्ड कर्प्स (आईआरजीसी) ले यो सफल कार्य सम्पन्न गरेको हो।

यदि दाबी सत्य सावित भयो भने, इरान विश्वको पहिलो देश बन्नेछ जसले अमेरिकी एफ–३५ विमानलाई युद्धको मैदानमा ध्वस्त पार्न सफल भएको छ। एफ–३५ सामान्यतया अत्याधुनिक राडार र इलेक्ट्रोनिक सिस्टमले सुरक्षित रहन्छ, तर इरानले यसको एउटा कमजोरी — इन्जिनबाट निस्कने अत्यधिक तापक्रम (इन्फ्रारेड रेडिएसन) — पत्ता लगाएको जनाएको छ।

मजीद सर्ट-रेन्ज एयर डिफेन्स सिस्टमले राडारमा निर्भर नहुने भएकाले इन्फ्रारेड प्रविधिबाट विमानलाई निशाना बनाएको दाबी गरिएको छ। एक मिसाइल प्रहारमा विमानलाई खसालिएको उल्लेख गरिएको छ। अमेरिकी समाचार संस्था सीएनएन का स्रोतले पनि एफ–३५ विमानले मध्यपूर्वमा आपत्कालीन अवतरण गर्नु परेको जानकारी दिएका छन्।

इरानी रणनीति अनुसार अमेरिका र इजरायलले गत फेब्रुअरी २८ मा आक्रमण गर्दा इरानले आफ्ना वास्तविक राडार प्रणाली बन्द गरेर नक्कली राडार ढाँचाहरू राखेको थियो। अमेरिकी र इजरायली ड्रोनहरूले ती नक्कली ढाँचाहरू नष्ट गरेपछि तिनीहरू इरानी हवाई सुरक्षा प्रणाली समाप्त भएको भ्रममा परेका थिए।

त्यसपछि इरानले १० दिनदेखि बन्द राखेका मजीद जस्ता प्रणालीहरू सक्रिय बनाएर आफ्नो वास्तविक हवाई सुरक्षा प्रणाली प्रयोग गरेको थियो। परिणामस्वरूप अमेरिकी एफ–३५ विमान ‘अदृश्य’ मानिन्थ्यो, तर अन्ततः इरानी सुरक्षा प्रणालीको जालमा पर्न पुगेको इरानी दाबीमा उल्लेख छ।

विशेषज्ञहरूले यस घटनालाई मध्यपूर्वमा इरानको रणनीतिक क्षमता र अमेरिका–इजरायलको हवाई अभियानमा चुनौतीको रूपमा मूल्याङ्कन गरेका छन्।