उत्तरी इराकको स्वशासित क्षेत्र कुर्दिस्तानमा भएको हमलामा परी एक जना फ्रान्सेली सैनिकको ज्यान गएको छ । फ्रान्सेली सेनाको सासोर अल्पिन्स द भार्स रेजिमेन्ट अन्तर्गत सातौँ बटालियनका चिप वारेन्ट अफिसर आर्नो फ्रियोँको मृत्यु भएको हो ।

फ्रान्सेली राष्ट्रपति इम्यानुएल म्याक्रोंले उनको मृत्युको पुष्टि गर्दै यस घटनालाई ‘अस्वीकार्य’ भन्दै निन्दा गरेका छन् । म्याक्रोंले कुर्दिस्तानको राजधानी इर्बिल क्षेत्रमा तैनाथ ती सैनिकले फ्रान्सका लागि आफ्नो ज्यान अर्पण गरेको टिप्पणी गरेका छन् । सोही आक्रमणमा अन्य केही सैनिकहरू समेत घाइते भएका छन् ।

फ्रान्सेली सेना सन् २०१५ देखि आतंककारी संगठनविरुद्ध अन्तर्राष्ट्रिय गठबन्धनको हिस्साका रूपमा त्यस क्षेत्रमा तैनाथ छ । राष्ट्रपति म्याक्रोंले इराकमा फ्रान्सेली सेनाको उपस्थिति आतंकवाद विरुद्धको लडाइँमा मात्र सीमित रहेको प्रष्ट पार्दै इरानसँगको तनावका नाममा यस्ता आक्रमण हुनु न्यायोचित नहुने बताएका छन् ।

यसैबीच, इराकमा रहेका इरान समर्थित सशस्त्र समूहहरूले यस आक्रमणको जिम्मेवारी लिएका छन् । ती समूहले आगामी दिनमा पनि फ्रान्सेली हितमाथि प्रहार गर्ने चेतावनी दिएका छन् ।

पछिल्लो समय इराकमा अमेरिकी र विदेशी सेना लक्षित आक्रमणहरू तीव्र भएका छन् । पश्चिम एशियामा बढ्दो तनावलाई मध्यनजर गर्दै फ्रान्सले यसै हप्ता आफ्नो विमानवाहक युद्धपोत ‘चार्ल्स द गल’ लाई भूमध्य सागरमा तैनाथ गर्ने र साइप्रसमा थप हवाई रक्षा प्रणाली पठाउने निर्णय समेत गरेको छ ।