अमेरिकी प्रतिबन्धका कारण गहिरिँदै गएको ऊर्जा संकटबीच क्युबा का एक मेकानिकले अनौठो समाधान निकालेर सबैलाई चकित पारेका छन्। केवल आठ कक्षासम्म अध्ययन गरेका ५६ वर्षीय ह्वान कार्लोस पिनो ले आफ्नो पुरानो कारलाई कोइलाबाट चल्ने बनाएका छन्।

रोयटर्सका अनुसार पिनोले सन् १९८० मा पोल्याण्ड मा निर्मित ‘फियाट पोल्स्की’ कारलाई परिमार्जन गर्दै पेट्रोलको सट्टा कोइलाबाट चल्ने प्रणाली विकास गरेका हुन्। उनले यो उपकरण हवानाबाट करिब ७० किलोमिटर पूर्वमा रहेको अग्वाकाटे सहरस्थित आफ्नो वर्कशपमा तयार पारेका हुन्।

जनवरीदेखि संयुक्त राज्य अमेरिका ले क्युबामा तेल ढुवानी रोकेपछि त्यहाँ इन्धनको चरम अभाव भएको छ। यस्तो अवस्थामा पेट्रोलभन्दा सस्तो र सहज उपलब्ध कोइला वैकल्पिक इन्धनको रूपमा प्रयोग हुन थालेको छ।

पिनोको कारमा पछाडि जडान गरिएको करिब ६० लिटर क्षमताको ट्याङ्कीमा कोइला बालिन्छ, जसबाट उत्पन्न ग्यासलाई इन्जिनमा प्रयोग गरिन्छ। पुराना सामान र कबाडीबाट बनाइएको यो प्रणालीमा स्टेनलेस स्टीलको दूधको जग र पुराना कपडाबाट फिल्टर समेत तयार गरिएको छ।

उनको यो आविष्कारले स्थानीय समुदायमा निकै चर्चा पाएको छ। सहरवासीहरू कार हेर्न र तस्बिर खिच्न भेला हुने गरेका छन् भने धेरैले आफूका लागि पनि यस्तो प्रविधि बनाउन अनुरोध गरेका छन्।

पिनोले संकटको अवस्थामा यो सबैभन्दा उपयोगी विकल्प भएको बताएका छन्। उनले भविष्यमा ट्र्याक्टरलाई पनि यस्तै प्रविधिबाट चलाउने योजना बनाएका छन्, जसले कृषिमा सहयोग पुर्‍याउने अपेक्षा गरिएको छ।

भेनेजुएला बाट हुने तेल आपूर्ति घटेपछि र अमेरिकी दबाब बढेपछि क्युबामा ऊर्जा संकट अझ गम्भीर बनेको छ। अहिले त्यहाँ बिजुली कटौती सामान्य भएको छ भने कालोबजारमा पेट्रोलको मूल्य अत्यधिक बढेको छ।

पिनोको आविष्कारले यस्तो कठिन परिस्थितिमा पनि स्थानीय स्तरमा सम्भावित समाधान खोज्न सकिने सन्देश दिएको छ। धेरैले उनको कामलाई ऊर्जा संकटबीच आशाको किरणका रूपमा लिएका छन्।