कतारको राजधानी दोहामा मंगलबार राति शृङ्खलाबद्ध शक्तिशाली विस्फोटका आवाजहरू सुनिएका छन्। स्थानीय समयअनुसार राति करिब १:४० बजे दोहाको आकाशमा पाँचवटा ठूला विस्फोटका आवाज गुन्जिएको समाचार अलजजिराले प्रकाशित गरेको छ।

मध्यपूर्वमा जारी तनाव र इरानले सुरु गरेको आक्रमणको सिलसिलाका बिच कतारको राजधानीमा यी विस्फोटहरू भएका हुन् । यसअघि मंगलबार बिहान पनि सहरमा विस्फोटका आवाजहरू सुनिएका थिए ।

विस्फोटका कारण सहरबासीहरूमा त्रास फैलिएको भए पनि हालसम्म कुनै मानवीय क्षति वा भौतिक संरचनामा क्षति पुगेको जानकारी प्राप्त भएको छैन । अधिकारीहरूले विस्फोटको प्रकृति र त्यसबाट भएको क्षतिको विस्तृत विवरण संकलन गरिरहेका छन् ।

इरान र इजरायल–अमेरिकाबिचको बढ्दो द्वन्द्वका कारण मध्यपूर्वका अन्य देशहरूसँगै कतारमा पनि सुरक्षा संवेदनशीलता उच्च बनेको छ ।