सल्यान । क्रान्तिकारी कम्युनिष्ट पार्टी सल्यानको जिल्ला कमिटी बैठक हिजो सम्पन्न भएको छ। बैठकले पार्टीका केन्द्रीय कार्यक्रमहरूलाई जिल्लास्तरमा सशक्त रूपमा कार्यान्वयन गर्ने निर्णय गरेको जनाएको छ।

बैठकपश्चात पार्टीले चुनाव बहिष्कार अभियानलाई तीव्र बनाएको जानकारी दिएको छ। सोही क्रममा सल्यानका श्रीनगर, ढोरचौर, थारमारे र बाङ्गेलाकुरी लगायतका स्थानमा कालो ब्यानर टाँसिएको छ। ब्यानरमा “बुर्जुवा प्रतिक्रियावादी संसदीय व्यवस्था खारेज गरौँ”, “नयाँ जनवादको खुड्किलो पार गर्दै वैज्ञानिक समाजवादका लागि संघर्ष गरौँ”, “साम्राज्यवादद्वारा प्रायोजित संसदीय निर्वाचन बहिष्कार गरौँ” तथा “स्वाधीन संयुक्त सरकार गठन गरौँ” जस्ता नारा उल्लेख गरिएको छ।

पार्टीले जिल्लामा चुनाव बहिष्कार कार्यक्रमलाई सशक्त बनाउँदै लैजाने बताएको छ। साथै भ्रष्टाचारविरुद्धको अभियानलाई तीव्रता दिइने जनाउँदै पीडित सल्यानी जनताका मुद्दालाई पार्टीले प्राथमिकताका साथ उठाउने प्रतिबद्धता व्यक्त गरेको छ।

पार्टीका अनुसार सल्यानमा विद्यार्थीहरूको हक-हित संरक्षणका लागि विशेष पहल थालिनेछ। शैक्षिक क्षेत्रमा देखिएका अन्याय, महँगी र विभेदविरुद्ध संगठित संघर्ष गरिने जनाइएको छ। साथै ठगी तथा विभिन्न समस्यामा परेका सोझा सल्यानी नागरिकलाई न्याय दिलाउन पार्टीले आवश्यक पहल गर्ने र भ्रष्टाचारमा संलग्न व्यक्तिहरूमाथि कारबाहीको माग गर्दै कडा रूपमा उत्रिने चेतावनी दिएको छ। साथै आगामि दिनमा पार्टीले विद्यार्थी र युवालाई नेतृत्वमा अगाडि ल्याएर देशमा आमूल परिवर्तनको अभियान अघि बढाइने निष्कर्ष समेत निकालेको पार्टीले जनाएको छ।

\