काठमाडौँ : संयुक्त अधिराज्य बेलायतका मेजर जेनरल जेरल्ड एम स्ट्रिकलेण्ड नेतृत्वको टोलीले राष्ट्रपति रामचन्द्र पौडेलसमक्ष गोर्खा ब्रिगेडको सन् २०२५ को वार्षिक प्रतिवेदन प्रस्तुत गरेको छ।

प्रतिवेदन ग्रहण गर्दै राष्ट्रपति पौडेलले नेपाल र बेलायतबीच सदियौँदेखि घनिष्ठ सम्बन्ध रहँदै आएको उल्लेख गरे। उनले विकास, मानव कल्याण र शान्तिसँग सम्बन्धित विषयमा दुवै देशले अन्तर्राष्ट्रिय मञ्चहरूमा सहकार्य गर्दै आएको र संयुक्त राष्ट्रसंघीय शान्तिसेनामार्फत विश्व शान्ति स्थापनामा समान धारणा राखिरहेको बताए।

संयुक्त अधिराज्य नेपालका महत्वपूर्ण विकास साझेदारमध्ये एक भएको उल्लेख गर्दै राष्ट्रपति पौडेलले नेपालको विकासमा निरन्तर सहयोग पुर्‍याउँदै आएकोमा बेलायत सरकारप्रति आभार व्यक्त गरे। साथै, ब्रिटिश गोर्खाको प्रशंसनीय सेवाले नेपाल–बेलायत द्विपक्षीय सम्बन्ध थप मजबुत बनेको भन्दै बेलायतमा नेपालीहरूको उपस्थितिले जनस्तरको सम्बन्ध अझ सुदृढ भएको धारणा राखे।

पूर्व ब्रिटिश गोर्खाका केही जायज मागहरू कूटनीतिक तहमा छलफल भइरहेको जनाउँदै राष्ट्रपति पौडेलले द्विपक्षीय संयन्त्रमार्फत चाँडै समाधान खोजिने विश्वास व्यक्त गरे। प्रतिवेदनमाथि सम्बन्धित निकायले आवश्यक अध्ययन गर्ने पनि उनले बताए।

सो अवसरमा मेजर जेनरल स्ट्रिकलेण्डले ब्रिटिश गोर्खा सधैं अग्रपंक्तिमा रहेर सेवा गर्दै आएको भन्दै प्रशंसा गरे। गोर्खा भर्ती भएका युवालाई नेपालका छोरा–छोरीका रूपमा सम्मान गर्ने गरिएको र बेलायती जनताले गोर्खा नेपालीहरूप्रति गहिरो माया र सम्मान प्रकट गर्ने गरेको उल्लेख गरे।