सल्यान, १३ फागुन । क्रान्तिकारी कम्युनिस्ट पार्टी, नेपाल जिल्ला समिति सल्यानले आफ्ना जिल्ला कमिटी सदस्य गिरधल बस्नेतलाई बिना पक्राउ पुर्जी नियन्त्रणमा लिइएको भन्दै घोर भर्त्सना गरेको छ। शारदा नगरपालिका-१३ निवासी बस्नेतलाई मोख्ला बजारमा खाजा खाइरहेको अवस्थामा सादा पोशाकमा आएका व्यक्तिहरुले नियन्त्रणमा लिएको पार्टीले जनाएको छ।

पक्राउ गर्ने क्रममा प्रहरीको टोलीले माथिबाट ट्राफिक आदेश आएको भन्दै, बस्नेतलाई नियन्त्रणमा लिएर बन्दी बनाएको दाबी गरिएको छ। पार्टीले उक्त पक्राउ प्रक्रियामा कुनै पनि कानुनी आधार नभएको र औपचारिक पुर्जी समेत नदिई नियन्त्रणमा लिएकाले यो कदम पूर्णतः गैरकानुनी र स्वेच्छाचारी रहेको बताएको छ।

जिल्ला समिति सल्यानका सेक्रेटरी उज्ज्वलद्वारा जारी प्रेस विज्ञप्तिमा उक्त घटनालाई निन्दनीय र असंवैधानिक कार्यको संज्ञा दिइएको छ। विज्ञप्तिमा नेपालको संविधानले नै प्रत्येक नागरिकलाई सुनिश्चित गरेको शान्तिपूर्ण विरोध प्रदर्शन गर्न पाउने र आफ्ना विचार राख्न पाउने संविधानप्रदत्त मौलिक अधिकारलाई समेत कुण्ठित हुने गरेर पक्राउ गरिएको आरोप लगाइएको छ।

पार्टीले आफ्ना नेता बस्नेतलाई तत्काल निःशर्त रिहा गर्न माग गर्दै घटनाको निष्पक्ष छानबिनको माग समेत गरेको छ। साथै, संवैधानिक हकको उल्लंघन गर्दै सादा पोशाकमा आएर विना आधार पक्राउ गर्ने कार्यमा संलग्न दोषीमाथि कारबाही गर्न सम्बन्धित निकायको ध्यानाकर्षण गराउँदै माग पूरा नभए सशक्त आन्दोलनमा उत्रने चेतावनी समेत दिइएको छ।