काठमाडौं, ११ फागुन – ठगी, आपराधिक विश्वासघात तथा सम्पत्ति शुद्धीकरणको अनुसन्धानमा तानिएकी तुलसा भनिने तुल्सी अधिकारीलाई भ्रामक सूचना नफैलाउन प्रहरीले अनुरोध गरेको छ।

जिल्ला प्रहरी परिसर ललितपुरका एसपी तथा प्रवक्ता गौतम मिश्रले एक सूचना जारी गर्दै अनुसन्धान भइरहेको विषयमा गलत सूचना नप्रसार गर्न र अनुसन्धान निकायमा उपस्थित हुन आग्रह गरेका छन्।

आफूमाथि अनुसन्धान सुरु भएपछि चीनबाट सामाजिक सञ्जाल टिकटकमार्फत उनले प्रहरीको आलोचना गरेकी थिइन्। नेपालमा रहँदा प्रहरीले छलफलका लागि नबोलाएको र चीन पुगेपछि पक्राउ पुर्जी जारी गरिएको भन्दै उनले प्रहरीको भूमिकामाथि प्रश्न उठाएकी थिइन्।

प्रहरीका अनुसार कुमार चिमोरियाले २२ साउन २०८२ मा प्रहरी वृत्त सातदोबाटोमा तुल्सी अधिकारीविरुद्ध ठगी तथा आपराधिक विश्वासघातको कसुरमा जाहेरी दिएका थिए, जसको हाल अनुसन्धान भइरहेको छ। अनुसन्धानकै क्रममा उनी सम्पत्ति शुद्धीकरणको कसुरमा पनि जोडिएकी हुन्।

२० कात्तिक २०८२ मा सम्पत्ति शुद्धीकरण विभागको सुझावअनुसार उनीमाथि सो कसुरमा पनि अनुसन्धान सुरु गरिएको एसपी मिश्रले जानकारी दिए।

प्रहरीले दुई मुद्दामा भइरहेको अनुसन्धानलाई प्रभावित पार्ने फोटो, भिडियो तथा भ्रामक सूचना सम्प्रेषण नगर्न चेतावनी दिँदै त्यस्ता गतिविधि पुनः अनुसन्धानको विषय बन्न सक्ने भन्दै सजग गराएको छ।