सिरहामा प्रहरीले गोली चलाएर एक जना भारतीय नागरिकलाई पक्राउ गरेको छ । पक्राउ पर्नेमा भारतको बिहार राज्य मधुवनी जिल्ला निवासी अन्दाजी २४ वर्षीय अब्दुल कलाम रहेका छन् । 

खुट्टामा गोली चलाएर प्रहरीले नियन्त्रणमा लिएको जिल्ला प्रहरी कार्यालय सिरहाले जनाएको छ। भारतसँग सिमाना जोडीएको सिरहाकाे नवराजपुर गाउँपालिका-४ स्थित लागुऔषध कारोबारको डिल भइरहेको भन्ने  विशेष सूचनाको आधारमा प्रहरी परिचालन गरेको थियो । प्रहरीको सर्चको क्रममा लागुऔषध कारोबारमा संलग्नलाई नियन्त्रणमा लिन खोज्दा उनीहरूले प्रतिरोध गरेपछि गोली चलेको प्रहरीले जनाएको छ ।

प्रहरीको गोली लागेर घाइते भएका कलामलाई प्रादेशिक अस्पताल सिरहामा भर्ना गरिएको छ । उनको साथबाट प्रहरीले १ सय २२ .८ मिलि ग्राम ब्राउनसुगर बरामद गरेको छ ।

सूचना अधिकारी पालका अनुसार उनीहरू दुई ओटा मोटर साइकलमा चार जना आएका थिए प्रहरीले गोली चलाउँदा ३ जना भने फरार भएका थिए । प्रहरीले घटनास्थलबाट दुई थान भारतीय नम्बर प्लेटकाे मोटर साइकल समेत बरामद गरेको जनाएको छ । 

उनीहरू भारत तर्फ नै भागेकाले जनाएको छ । सिरहामा  केही दिन अघि पनि सिरहा प्रहरीले गोली चलाएर दुई भारतीय लागुऔषध कारोबारीलाई पक्राउ गरेको थियो ।

घटनाबारे थप अनुसन्धान भइरहेको जिल्ला प्रहरी कार्यालय सिरहाका सूचना अधिकारी डीएसपी रमेश बहादुर पालले बताए ।