आमनिर्वाचन आउन १५ दिन मात्र बाँकी रहँदा पूर्वराजा ज्ञानेन्द्र शाहले आम रूपमा समझदारी गरेर मात्र चुनावमा जानुपर्ने बताएका छन्। 

राजनीतिक दलहरू चुनावी प्रचारप्रसारका क्रममा घरदैलो तथा सभा, जुलुसलगायतका कार्यक्रममा व्यस्त रहेका बेला पूर्वराजाको यस्तो अभिव्यक्ति आएको हो। 

राष्ट्रिय प्रजातन्त्र दिवसको पूर्वसन्ध्यामा एउटा भिडिओ सन्देश दिँदै शाहले ठूलो राजनीतिक उथलपुथल निम्त्याएको जेन जी आन्दोलनपछि गठित अन्तरिम सरकारले फागुन २१ गतेका लागि तोकिएको चुनाव गराउने गरी काम गरिरहेका बेला अहिले त्यो उपयुक्त नभएको बताएका छन्।

प्रजातन्त्रमा जनता आफैँ जागरुक बनेर समाज र राष्ट्रसेवाको सत्कर्ममा अग्रसर हुन पाउनुपर्ने भए पनि कसैलाई खुसी पार्नुपर्ने अनि कसैबाट तोकिनुपर्ने बाध्यात्मक व्यवस्थाको जन्जिरमा बाँधिनुपरेको उनले टिप्पणी गरेका छन्। 

आफ्नो सन्देशमा पूर्वराजा शाहले अहिलेको व्यवस्थाप्रति विमति दोहोर्‍याएका छन्।

तर अन्तरिम प्रधानमन्त्री सुशीला कार्कीका प्रेस सल्लाहकार रामबहादुर रावलले सिङ्गो देश निर्वाचनमा होमिइसकेको भन्दै तोकिएकै समयमा चुनाव हुने प्रतिक्रिया दिएका छन्। 

 #GyanendraShah #NepalPolitics