नेपाल कम्युनिष्ट पार्टी (नेकपा) सम्बद्ध विद्यार्थी संगठन अखिल क्रान्तिकारीले त्रिभुवन विश्वविद्यालय (त्रिवि) का उपकुलपति दीपक आर्याल र रजिस्ट्रार केदार रिजालको कुर्सीमा अपशब्दसहितको पर्चा टाँसेर विरोध जनाएको छ। ‘म शैक्षिक माफिया हुँ’ जस्ता आपत्तिजनक शब्द लेखिएको पर्चा टाँस्दै संगठनले शुल्क समायोजनसम्बन्धी सहमति कार्यान्वयन नभएको आरोप लगाएको हो।

अखिल क्रान्तिकारीका अध्यक्ष दिनेश ऐरले सामाजिक सञ्जालमार्फत फोटो सार्वजनिक गर्दै त्रिवि प्रशासनप्रति असन्तुष्टि व्यक्त गरेका छन्। यसअघि पनि उनीहरूले उपकुलपति, रेक्टर र रजिस्ट्रारको कार्यालयमा तालाबन्दी गरेका थिए, जुन पछि प्रहरीको सहयोगमा खोलिएको थियो।

त्रिवि प्रशासनले सर्वोच्च अदालतको आदेशअनुसार तालाबन्दी खोलिएको जनाएको छ भने विद्यार्थी संगठनले आफ्ना माग तत्काल सम्बोधन गर्न आग्रह गर्दै विरोधका कार्यक्रम जारी राख्ने चेतावनी दिएको छ।