काठमाडौं – आगामी फागुन २१ गते प्रतिनिधिसभा सदस्यको निर्वाचन नजिकिँदै गर्दा सिंहदरबारस्थित नयाँ संसद् भवन अझै पूर्ण रूपमा तयार भएको छैन।

सरकारी तथ्यांकअनुसार भवन निर्माणको काम करिब ८८ प्रतिशत मात्र सम्पन्न भएको छ। नयाँ भवनमा प्रतिनिधिसभा, राष्ट्रिय सभा, संसदीय दलका कार्यालय, सचिवालय र अन्य आवश्यक संरचनाहरू निर्माण भइरहेको छ। ७०० सिट क्षमताको प्रतिनिधिसभा बैठक कक्ष, २९० सिटको राष्ट्रिय सभा कक्ष र ३५० सिटको संयुक्त लबी तयार हुँदैछ।

२०७६ असोज १६ गते पाँच अर्ब दुई करोड रुपैयाँ लागतमा ठेकेदारसँग सम्झौता भए पनि निर्धारित समयभित्र काम पूरा नभएपछि म्याद पटक–पटक थपिँदै आएको छ। शहरी विकास मन्त्रालयले भवनलाई अत्याधुनिक सुविधासम्पन्न बनाउन निर्देशन दिइरहेको जनाएको छ।

भवनमा वीआईपी र सर्वसाधारणको लागि अलग प्रवेशद्वार, सांसद र दलका प्रमुख सचेतकको लागि विशिष्ट कक्ष, र १० राजनीतिक दलका लागि संसदीय दलको कार्यालय समेत निर्माण भइरहेको छ।

सरकारले २०६४ सालदेखि बानेश्वरको अन्तर्राष्ट्रिय सम्मेलन केन्द्र भाडामा लिएर संसद् बैठक सञ्चालन गर्दै आएको थियो। तर जेन–जी आन्दोलनको समयमा भएको तोडफोड र आगजनीपछि नयाँ भवनमै संसद् बैठक सञ्चालन गर्ने तयारी भइरहेको छ।