नेकपा (एमाले) का अध्यक्ष केपी शर्मा ओलीले देशको परिवर्तन विध्वंस होइन, निर्माण र विकासमार्फत सम्भव हुने बताएका छन्। झापाको गौरीगञ्जमा आयोजित कार्यक्रममा बोल्दै उनले पूर्वाधार विकास, सामाजिक सुरक्षा, शिक्षा र डिजिटल पहुँचलाई समृद्धिको आधारका रूपमा प्रस्तुत गरे।

गौरीगञ्जसँग आफ्नो आधा शताब्दीभन्दा लामो सम्बन्ध रहेको उल्लेख गर्दै ओलीले हुलाकी राजमार्ग, आधुनिक पुल, चिल्ला सडक, सञ्चार क्रान्ति र सामाजिक सुरक्षाले गाउँको स्वरूप परिवर्तन भएको बताए। उनले सामाजिक सुरक्षा भत्तालाई ४ हजार रुपैयाँ पुर्‍याएर ज्येष्ठ नागरिक, एकल महिला र अपाङ्गता भएका व्यक्तिलाई सम्मानजनक जीवनयापनको आधार दिएको उल्लेख गरे।

ओलीले अन्धविश्वास, कुरीति र गरिबी हटाउँदै शिक्षा, चेतना र रोजगारीमार्फत समाज परिवर्तन गर्नुपर्ने धारणा राखे। युवाहरूलाई कुलतबाट टाढा रहँदै देश निर्माणमा सक्रिय भूमिका खेल्न आग्रह गर्दै उनले सही नेतृत्व र नीतिमार्फत मात्र समृद्ध नेपाल सम्भव हुने बताए।

“परिवर्तन आगो लगाएर होइन, निर्माण गरेर हुन्छ,” उनले दोहोर्‍याउँदै समृद्ध नेपाल, सुखी नेपालीको लक्ष्यमा निरन्तर अघि बढ्ने प्रतिबद्धता व्यक्त गरे।