काठमाडौं, २७ माघ: काठमाडौं महानगरपालिकाकी कार्यवाहक प्रमुख सुनिता डंगोलले विद्यालय केन्द्रित एचपीभी खोप अभियान व्यवस्थित रुपमा सञ्चालन गर्न सम्बन्धित सबै पक्षलाई निर्देशन दिएकी छिन्।

मंगलवार दिल्लीबजारस्थित पद्यकन्या माध्यमिक विद्यालयमा उद्घाटन गर्दै उनले महानगरपालिका स्वास्थ्य विभाग र अन्य जिम्मेवार निकायलाई अभियान सफल बनाउन सचेत गराइन्।

सरकारले पाठेघरको मुखको क्यान्सरबाट जोगिन नि:शुल्क एचपीभी खोप उपलब्ध गराएको छ। डंगोलले विद्यालयभित्र सञ्चालन भइरहेका यस खोप कार्यक्रमबाट अधिकतम किशोरीहरुले लाभ लिनुपर्नेमा जोड दिइन्।

उनले भनिन्, “पहिलो वर्षमा यस खोपका लागि शुल्क तिर्नुपर्ने हुन्थ्यो, तर अहिले निशुल्क स्कुलस्कुलमा उपलब्ध छ। सबै बहिनीहरुले यसबाट लाभ लिनुहोस् र कार्यक्रम सफल बनाउन सहयोग गर्नुहोस्।”

महानगरपालिकाले पाठेघरको मुखको क्यान्सरबाट जोगिन खोप अभियानलाई सबै स्कुलमा व्यवस्थित रूपमा अघि बढाउने योजना बनाएको छ।