सल्यान । क्रान्तिकारी कम्युनिष्ट पार्टी नेपाल, सल्यानले आसन्न संसदीय निर्वाचनको विरोधमा जिल्लाका विभिन्न स्थानमा प्रदर्शन सुरु गरेको छ। चुनाव बहिष्कार अभियान अन्तर्गत पार्टीले मंगलबार शारदा नगरपालिका-१ को मुख्य व्यापारिक केन्द्र श्रीनगरमा कालो झण्डा गाडेर आफ्नो सांकेतिक विरोध जनाएको हो।

जिल्ला कमिटीको हालै सम्पन्न बैठकले निर्वाचन बहिष्कारलाई सशक्त बनाउने निर्णय गरेसँगै पार्टीका कार्यकर्ताहरूले जिल्लाभर कालो ब्यानर टाँस्ने र विरोध प्रदर्शन गर्ने कार्यलाई तीव्रता दिएका छन्। आज श्रीनगरमा गरिएको प्रदर्शन पनि सोही पूर्व निर्धारित कार्यक्रमको निरन्तरता भएको पार्टीले स्पष्ट पारेको छ।

संसदीय व्यवस्थाको विरोध र नयाँ विकल्पको माग

पार्टीले वर्तमान संसदीय व्यवस्थालाई 'बुर्जुवा प्रतिक्रियावादी व्यवस्था'को संज्ञा दिँदै यसबाट आम नागरिकको समस्या समाधान नहुने दाबी गरेको छ। साम्राज्यवादी शक्तिहरूद्वारा प्रभावित निर्वाचनले मुलुकलाई निकास नदिने भन्दै पार्टीले नयाँ जनवाद हुँदै वैज्ञानिक समाजवादको दिशामा अघि बढ्नुपर्ने राजनीतिक कार्यदिशा अघि सारेको छ। उनीहरूले वर्तमान व्यवस्थाको सट्टा स्वाधीन संयुक्त सरकार गठनको मागसमेत दोहोर्‍याएका छन्।

भ्रष्टाचारविरुद्ध र जनजीविकाको मुद्दा

चुनाव बहिष्कारसँगै पार्टीले स्थानीय जनजीविका र भ्रष्टाचारविरुद्धका मुद्दाहरूलाई पनि सँगसँगै लैजाने घोषणा गरेको छ। जिल्लामा व्याप्त भ्रष्टाचार, ठगी र अनियमितताविरुद्ध कडा कदम चाल्ने तथा पीडित सल्यानी नागरिकलाई न्याय दिलाउन संघर्ष गर्ने पार्टीको तयारी छ। विशेषगरी विद्यार्थीहरूको हक–हित र शैक्षिक समस्या समाधानका लागि विशेष पहल गरिने बताइएको छ।

आगामी रणनीति

क्रान्तिकारी कम्युनिष्ट पार्टीले निर्वाचनको मिति नजिकिँदै गर्दा आफ्ना गतिविधिहरूलाई गाउँ-गाउँसम्म विस्तार गर्ने जनाएको छ। भ्रष्टाचारमा संलग्नहरूलाई जनकारबाही गर्ने र संसदीय निर्वाचनलाई पूर्ण रूपमा असफल बनाउन थप सशक्त कार्यक्रमहरू ल्याउने चेतावनीसमेत पार्टीले दिएको छ।