काठमाडौँ । नेपाली कांग्रेसका तत्कालीन सभापति तथा पूर्वप्रधानमन्त्री सुशील कोइरालाको आज १०औँ स्मृति दिवस विविध कार्यक्रम गरी मनाइँदै छ।

संविधानसभामार्फत २०७२ असोज ३ गते नेपालको संविधान जारी हुँदा उनी प्रधानमन्त्री थिए। संविधान जारी भएको चार महिनापछि अर्थात् २०७२ माघ २६ गते काठमाडौँको महाराजगञ्जस्थित आफ्नै निवासमा निमोनियाका कारण उनको निधन भएको थियो।

कांग्रेसभित्र ‘सुशील दा’ भनेर चिनिने कोइराला दोस्रो संविधानसभा निर्वाचनपछि नेपालको ३७औँ प्रधानमन्त्री बनेका थिए। उनी नेतृत्वमा रहँदा नेपालमा पहिलोपटक संविधानसभाबाट संविधान जारी भएको ऐतिहासिक उपलब्धि हासिल भयो।

वि.सं. १९३९ सालमा विराटनगरमा जन्मिएका कोइराला २०१० सालदेखि राजनीतिमा सक्रिय थिए। २०१७ सालमा तत्कालीन राजा महेन्द्रले जननिर्वाचित सरकार अपदस्त गरेपछि उनी १६ वर्षसम्म भारतमा प्रवासमा बसेर लोकतन्त्र पुनःस्थापनाको आन्दोलनमा सक्रिय रहे।

पाँच दशकभन्दा बढी समय राजनीतिमा सक्रिय कोइरालाले मन्त्री पदलगायत सरकारी लाभ अस्वीकार गर्दै सादगी र निष्ठाको राजनीति गरे। कांग्रेसका केन्द्रीय सदस्य, महामन्त्री, उपसभापति हुँदै १२औँ महाधिवेशनबाट सभापतिमा निर्वाचित भएका उनी पार्टीभित्र त्यागी र निष्ठावान नेताका रूपमा परिचित छन्।

कांग्रेस सभापति गगन थापाले सबैलाई समन्वय गर्दै संविधान जारी गराउन सुशील कोइरालाले खेलेको भूमिकालाई स्मरण गर्दै संविधानको प्रभावकारी कार्यान्वयनतर्फ दृढ प्रतिबद्ध रहन प्रेरणा मिल्ने बताएका छन्।

त्यसैगरी कांग्रेस नेता डा. शेखर कोइरालाले उनको सरल जीवनशैली, निष्ठा र दृढ संकल्पले नेपाली जनताको सात दशक लामो संविधानसभाबाट संविधान पाउने सपना साकार भएको उल्लेख गरेका छन्।

आज देशभर विभिन्न कार्यक्रम गरी लोकतन्त्र, संविधान र राष्ट्रिय राजनीतिमा सुशील कोइरालाको योगदान स्मरण गरिएको छ।