सल्यान, ४ फागुन ।सल्यान जिल्लामा आसन्न निर्वाचनको सरगर्मी बढ्दै गएको छ। यसै क्रममा नेशनल रिपब्लिक नेपालका तर्फबाट प्रतिनिधि सभा सदस्य पदका उम्मेदवार डिल्ली बहादुर घर्ती मगरले आज निर्वाचन कार्यालय सल्यान पुगेर आफ्नो आधिकारिक प्रतिबद्धता पत्र हस्तान्तरण गर्नुभएको छ। उम्मेदवार घर्तीले सार्वजनिक गरेको उक्त पत्रमा जिल्लाको विकास र राष्ट्रिय राजनीतिको सुधारका लागि दूरगामी योजनाहरू समावेश गरिएको छ।

सार्वजनिक प्रतिबद्धता पत्रमा समान मानव अस्तित्व कायम गर्ने विषयलाई प्राथमिकता दिइएको छ। उम्मेदवार घर्तीले जल, जमिन, जंगल, जडीबुटी तथा जैविक स्रोत जस्ता मुलवासी अधिकारको संरक्षण, संवर्द्धन र सही परिचालनमार्फत वैदेशिक हस्तक्षेप रोक्ने अठोट व्यक्त गर्नुभएको छ। साथै, आम नागरिकका आधारभूत आवश्यकताहरू जस्तै गाँस, बास, कपासको ग्यारेन्टी गर्दै निःशुल्क शिक्षा, स्वास्थ्य, रोजगारी र बेरोजगार भत्ताको व्यवस्था गर्ने प्रतिबद्धता उहाँको पत्रमा उल्लेख छ।

आर्थिक र प्रशासनिक सुधारका पक्षलाई समेट्दै घर्तीले विभेदरहित, भ्रष्टाचारमुक्त र सुशासनयुक्त राज्य निर्माणको संकल्प गर्नुभएको छ। आत्मनिर्भर अर्थतन्त्रको विकासका लागि राष्ट्रिय उद्योगहरूको स्थापना गर्ने, आयात प्रतिस्थापन गर्ने र प्रशोधित स्वदेशी वस्तुहरूको निर्यात वृद्धि गर्ने लक्ष्य राखिएको छ। विशेषगरी दलाल नोकरशाही पूँजी, कालोबजारी तथा स्रोत नखुलेको पूँजीलाई राष्ट्रियकरण गर्ने र राष्ट्रिय पूँजीको संरक्षण तथा प्रवर्द्धन गर्ने कडा नीति लिइने उम्मेदवार घर्तीको दाबी छ।

राजनीतिक संरचनामा व्यापक हेरफेरको प्रस्ताव गर्दै प्रतिबद्धता पत्रमा जननिर्वाचित राष्ट्र प्रमुख र प्रदेश प्रमुखको व्यवस्था हुनुपर्ने उल्लेख गरिएको छ। संसद सदस्य मन्त्री बन्न नपाउने र सम्बन्धित क्षेत्रका विज्ञ व्यक्तिहरूबाट मात्र मन्त्री नियुक्त गर्ने प्रणाली लागू गर्नुपर्ने नयाँ अवधारणा अघि सारिएको छ। यस्तै, पूर्ण समानुपातिक तथा समावेशी निर्वाचन प्रणाली कायम गर्ने प्रस्तावलाई पनि पार्टीले मुख्य एजेन्डा बनाएको छ।

सल्यान जिल्लाको समग्र विकासका लागि केन्द्रीय तथा राष्ट्रिय स्तरका योजनाहरूलाई सशक्त रूपमा अघि बढाउने प्रतिबद्धता व्यक्त गर्दै उम्मेदवार घर्तीले आफ्नो चुनाव चिह्न 'मौरी' मा मतदान गर्न अपील गर्नुभएको छ। प्रतिबद्धता पत्र सार्वजनिक गरेसँगै नेशनल रिपब्लिक नेपालले सल्यान जिल्लाभर आफ्नो चुनावी प्रचार-प्रसार अभियानलाई औपचारिक रूपमा तीव्रता दिएको जानकारी दिएको छ।