काठमाडौं — काठमाडौँ उपत्यकाका सार्वजनिक सवारी साधनमा आजदेखि सिसी क्यामरा जडान अभियान सुरु गरिएको छ।

काठमाडौँ उपत्यका ट्राफिक प्रहरी कार्यालयका प्रवक्ता नरेशराज सुवेदीका अनुसार आज आयोजित एक समारोहकाबीच काठमाडौँ उपत्यका प्रहरी कार्यालयका प्रमुख प्रहरी अतिरिक्त महानिरीक्षक ईश्वर कार्कीले सार्वजनिक सवारी साधनमा सिसी क्यामरा जडानको औपचारिक थालनी गरेका हुन्।

प्रवक्ता सुवेदीले यातायात व्यवसायीसँगको छलफलपछि आजदेखि सवारी साधनमा सिसी क्यामरा तथा ड्यासबोर्ड क्यामरा जडान अभियान सुरु गरिएको जानकारी दिए। उनले भने, “यस अभियानलाई तीव्र गतिमा अघि बढाइनेछ, जसले सवारी दुर्घटना न्यूनीकरण, अपराध नियन्त्रण, दुर्व्यवहार तथा चोरी नियन्त्रणमा सहयोग पुग्ने अपेक्षा गरिएको छ।”

उनका अनुसार पछिल्लो समय दुर्घटनापछि चालक फरार हुने, बसभित्र कुटपिट हुने, यात्रुमाथि दुर्व्यवहारजस्ता घटनाबारे गुनासो बढ्दै गएकाले क्यामरामार्फत निगरानी गर्दा वास्तविक तथ्य पत्ता लगाउन सहज हुने विश्वास गरिएको छ।

ड्यासबोर्ड क्यामरामार्फत बाहिरी गतिविधिको निगरानीका साथै दुर्घटना हुँदा कसको कमजोरी हो भन्ने विषयसमेत पहिचान गर्न सकिने भएकाले यसलाई प्राथमिकताका साथ कार्यान्वयन गरिने सुवेदीले बताए।

कार्यक्रममा प्रहरी अतिरिक्त महानिरीक्षक ईश्वर कार्कीले सार्वजनिक यातायातमा नागरिकको पहुँच बढी हुने भएकाले यसलाई प्रविधियुक्त बनाउँदा यात्रु थप सुरक्षित हुने बताए।

यसैबीच, आजै काठमाडौँ उपत्यकाका विभिन्न स्थान र समयमा चोरी भएका ५० वटा मोटरसाइकल तथा स्कुटर खोजतलास गरी प्रहरीले सम्बन्धित धनीलाई बुझाएको जनाएको छ।