गुल्मी, ७ माघ — गुल्मी जिल्लाको रुरु गाउँपालिका–१ खोल्टेपानीस्थित मदन भण्डारी सडक (रिडी–खर्ज्याङ खण्ड) मा बुधबार जिप दुर्घटना हुँदा एक जनाको मृत्यु भएको छ भने आठ जना घाइते भएका छन्।

पाल्पाको जोगिथुमबाट रिडी घाटतर्फ मलामी लिएर आउँदै गरेको लु १ च ६९८५ नम्बरको जिप दिउँसो सडकबाट करिब १० मिटर तल खसेर दुर्घटना भएको हो।

दुर्घटनामा घाइते भएका सबैलाई उद्धार गरी उपचारका लागि रुरु प्राथमिक स्वास्थ्य केन्द्र, रिडीमा पुर्‍याइएको थियो। उपचारका क्रममा पाल्पा जिल्लाको रिब्दिकोट गाउँपालिका–१ निवासी २६ वर्षीय टिकाराम कुमाललाई चिकित्सकले मृत घोषणा गरेको गुल्मीका प्रहरी नायब उपरीक्षक गंगाबहादुर सारुले जानकारी दिए। उनका अनुसार कुमालको टाउकोमा गम्भीर चोट लागेको थियो।

अन्य घाइतेहरूको अवस्था मध्यम रहेको र उनीहरूको उपचार भइरहेको प्रहरीले जनाएको छ। दुर्घटनाको कारणबारे थप अनुसन्धान भइरहेको प्रहरीले बताएको छ।