काठमाडौँ, – सङ्घीय राजधानी काठमाडौँ जिल्लाका १० वटै निर्वाचन क्षेत्रमा कुल ७ लाख १० हजार ७०८ मतदाता कायम भएका छन्। जिल्ला निर्वाचन कार्यालय काठमाडौँका अनुसार यसमध्ये ३ लाख ६४ हजार महिला र ३ लाख ४६ हजार ११६ पुरुष मतदाता रहेका छन्।

आगामी फागुन २१ गते हुने प्रतिनिधिसभा सदस्य निर्वाचनका लागि काठमाडौँमा ३२० मतदान स्थल र ८१७ मतदान केन्द्र तोकिएका छन्। जिल्ला निर्वाचन अधिकारी ठाकुरप्रसाद भट्टराईका अनुसार, निर्वाचन क्षेत्र नं. २ मा ८८ हजार ७०८ मतदातासहित सबैभन्दा बढी मतदाता रहेका छन्।

सबैभन्दा कम मतदाता निर्वाचन क्षेत्र नं. १ मा रहेका छन्, जहाँ ४८ हजार ८४९ मतदाता कायम छन्। अन्य क्षेत्रहरूमा मतदाताको संख्या ५७ हजारदेखि ८३ हजारसम्म रहेको निर्वाचन कार्यालयले जनाएको छ।

काठमाडौँका १० वटै निर्वाचन क्षेत्रमा गरी कुल २५७ उम्मेदवारले मनोनयन दर्ता गराएका छन्। सबैभन्दा बढी उम्मेदवार क्षेत्र नं. १ मा ३० र सबैभन्दा कम क्षेत्र नं. २ र ६ मा २२–२२ जना रहेका छन्।