१४ माघ, काठमाडौं — नारायणगढ–बुटवल सडकखण्ड अन्तर्गत नवलपुरको विनयी त्रिवेणी गाउँपालिका–२ स्थित दाउन्ने क्षेत्रमा सडक चिप्लो हुँदा राजमार्ग अवरुद्ध भएको छ।

जिल्ला प्रहरी कार्यालयका अनुसार बुधबार दिउँसोदेखि वर्षाका कारण निर्माणाधीन सडक खण्डमा माटो हिलो भएपछि सवारीसाधन सञ्चालनमा समस्या देखिएको हो। विशेष गरी दाउन्नेको उकालो भागमा सवारीसाधन उक्लिन नसक्दा राजमार्गमा जाम सिर्जना भएको प्रहरीले जनाएको छ।

दाउन्नेको घिउ खोलामा ढलान र विश्वकर्मा मन्दिर क्षेत्र आसपास कल्भर्ट निर्माणको काम भइरहेको छ। वर्षापछि ती क्षेत्रमा सडक अत्यधिक चिप्लो र हिलो हुँदा हाल करिब दुई सय सवारीसाधन जाममा फसेका छन्।

जिल्ला ट्राफिक प्रहरी कार्यालयका प्रमुख प्रहरी कुशल बर्तौलाका अनुसार सडक मर्मत कार्य जारी राख्दै हाल एकतर्फी सवारी सञ्चालन गरिएको छ। तर लामो जामको अवस्था रहेकाले यात्रुहरूलाई सडकको अवस्था बुझेर मात्र यात्रामा निस्कन जिल्ला प्रहरी कार्यालयले अनुरोध गरेको छ।