पशु बिक्री हुँदा दोहोरो बीमाको समस्या बढेको भन्दै बीमा नामसारी अनिवार्य गर्न आग्रह गरिएको छ। पशु खरिदपछि पुनः बीमा गर्दा किसानको रकम र सरकारले दिने अनुदान दुवै खर्च हुने भएकाले एउटै पशुमाथि दोहोरो बीमा नगर्न सरोकारवालाले सुझाव दिएका हुन्।

चितवन जिल्ला दुग्ध उत्पादक सहकारी सङ्घले आयोजना गरेको पशु बीमासम्बन्धी त्रिपक्षीय अन्तरक्रियामा सहभागीहरूले नामसारी नहुँदा बीमामा भ्रम र समस्या दोहोरिने गरेको बताएका छन्। अन्नपूर्ण दुग्ध उत्पादक सहकारीका अध्यक्ष प्रदीप तिमिल्सिनाले बीमा गरिएका पशुमा ट्याग बिग्रिने, फुत्कनेजस्ता समस्या समाधानमा बीमा कम्पनीले ध्यान नदिएको आरोप लगाए। पशु बिक्री हुँदा अवधि नसकिँदै किसान ठगिने गरेको उनको गुनासो थियो।

सङ्घका सचिव कल्याण अधिकारीले सहकारीमार्फत एकै पालिसीमा सबै कार्य गर्न नसक्दा र किसानहरूले अभिकर्तासँग बारम्बार सम्पर्क नजोड्दा समस्या थपिएको बताए। बीमा अभिकर्ताले बीमा कम्पनीलाई रकम नबुझाई किसानलाई झन्झट पर्ने गरेकोसमेत उनले उल्लेख गरे। उनले वन्यजन्तुको आक्रमणका कारण हुने क्षति पनि बीमामा समावेश गर्नुपर्ने धारणा राखे।

कार्यक्रममा राष्ट्रिय निकुञ्ज विभागका उपसचिव पुरुषोत्तम शर्माले वन्यजन्तु क्षतिमा सरकारले राहतको व्यवस्था गर्ने जानकारी दिए। त्यस्तै नेपाल बीमा प्राधिकरणका निर्देशक निर्मल अधिकारीले पशु बिक्रीपछिका तीन महिनासम्म बीमामा निःशुल्क नामसारी हुने प्रावधान रहेको भन्दै बीमा कम्पनीलाई दोहोरो बीमा नगर्न निर्देशन दिए। उनले राज्यको सम्पत्ति दुरुपयोग हुने कार्य नगर्न चेतावनी पनि दिए।

सरकारले पशु बीमामा ८० प्रतिशत अनुदान दिने व्यवस्था भएको उल्लेख गर्दै अधिकारीले अभिकर्तालाई जिम्मेवारीपूर्वक काम गर्न आग्रह गरे। चितवन सहकारी सङ्घका अध्यक्ष किशोर बगालेले जिल्लामा करिब एक लाख गाई र ७० हजार भैँसी रहेको बताउँदै किसानले बीमा कम्पनीबाट सेवा पाउन समस्या भइरहेको बताए। बफमाको दाबी भुक्तानी ढिलाइ हुने अवस्था जारी रहे किसान बीमाबाट विमुख हुन सक्ने चेतावनी उनले दिए।