काठमाडाैँ — जेनजी प्रतिनिधिहरू जापानमा जनवरी २०२५ मा पाँच दिन सञ्चालन भएको वर्ल्ड एक्स्पोमा भ्रष्टाचार भएको भन्दै उद्योग, वाणिज्य तथा आपूर्ति मन्त्रालय पुगेका छन्। शुक्रबार दिउँसो मन्त्रालय पुगेका प्रतिनिधिहरूले आयोजनासँग सम्बन्धित निर्णय प्रक्रियामा सरकारी कर्मचारीले कर्तव्य पूरा नगरी एकतर्फी निर्णय लिएको आरोप लगाएका छन्।

जेनजी प्रतिनिधि अविन गुरुङले बताएअनुसार, एक्स्पोसँग सम्बन्धित अनियमितता बारे अख्तियार दुरुपयोग अनुसन्धान आयोगमा उजुरी दिइसकिएको भए पनि सुनुवाई नभएपछि मन्त्रालयमा स्पष्टीकरण माग्न बाध्य भएका हुन्। उनले भने, “ठाडो उजुरी पनि परिसकेको तर सुनुवाई नभएपछि मन्त्रालयमा स्पष्टीकरण लिन आएको हो।”

अर्का प्रतिनिधि अमर सापकोटाले पनि सरकारी कर्मचारीले गैरजिम्मेवार व्यवहार गरेको र बारम्बार पत्राचार, उजुरी र पूरक उजुरी दिँदा पनि निष्कर्ष निस्केको छैन भन्दै गम्भीरता व्यक्त गरे। उनले भने, “दुवै पक्षलाई बोलाएर मात्रै छानबिन हुनुपर्नेमा त्यसो हुन नसक्नुले एक्स्पोमा देशको गौरवमा आँच पुग्ने खतरा छ।”

जेनजी प्रतिनिधिहरूले दोषी पत्ता लगाएर उचित कदम चाल्न मन्त्रालयसँग आग्रह गरेका छन्।