नेपाल नागरिक उड्डयन प्राधिकरण (क्यान) को निमित्त महानिर्देशक को बनाउने विषयमा प्रधानमन्त्री कार्यालयमा छलफल भइरहेको छ। बुधबार प्राधिकरणका महानिर्देशक प्रदीप अधिकारीमाथि अख्तियार दुरुपयोग अनुसन्धान आयोगले मुद्दा दायर गरेपछि उनी स्वतः निलम्बित भएका छन्। यसपछि तत्कालको रिक्ततामा काम चलाउन निमित्त महानिर्देशक तोक्नेबारे वैकल्पिक नाममा मंथन भएको हो।

प्रधानमन्त्री कार्यालयमा भएको छलफलमा तीनजनाको नाममाथि विचार भएको बताइएको छ। वरियताक्रमअनुसार उपमहानिर्देशक प्रतापबाबु तिवारी नै निमित्त पाउने योग्य व्यक्ति हुन्। तर उनको स्वभाव र पोखरा विमानस्थल सम्बन्धी भ्रष्टाचार अनुसन्धानमा सहभागी भएको विषय उठाउँदै उनलाई हटाएर विकल्पमा चर्चा भएको छ।

प्रधानमन्त्री सुशीला कार्कीले पाँचौँ नम्बरका कर्मचारी जगन्नाथ निरौलालाई निमित्त जिम्मेवारी दिन सुझाएकी थिइन्। उनी हाल पोखरा अन्तर्राष्ट्रिय विमानस्थलको नेतृत्वमा छन् र यसअघि त्रिभुवन विमानस्थलको नेतृत्व पनि सम्हालेका थिए। उद्योग, भूमि तथा कानुनमन्त्री अनिलकुमार सिन्हाले हवाई सुरक्षा सम्बन्धि उच्चस्तरीय समितिको अनुभव भएकाले देवचन्द्र लाल कर्णलाई जिम्मेवारी दिनुपर्ने तर्क राखेका छन्।

हाल क्यानका वरिष्ठ ६ कर्मचारीमध्ये प्रतापबाबु तिवारी, प्रेमनाथ ठाकुर र देवचन्द्र लाल कर्ण एयर ट्राफिक कन्ट्रोल पृष्ठभूमिका हुन्। हंसराज पाण्डे र बाबुराम पौडेल सिभिल इञ्जिनियरिङ पृष्ठभूमिका छन् भने निरौला लेखा समूहका व्यक्ति हुन्। हालको परिस्थितिमा हवाई सुरक्षा प्रमुख विषय भएकोले विज्ञ पृष्ठभूमिका व्यक्तिलाई नेतृत्व दिनुपर्ने मत पनि सुनिन्छ।

क्यानका कर्मचारी भने नियम अनुसार वरिष्ठ कर्मचारीलाई नै नेतृत्व दिन उपयुक्त ठान्छन्। पूर्वमा पहिलो वरियताका व्यक्तिलाई निमित्त जिम्मेवारी दिइएको अभ्यास अहिले पनि कायम राख्नुपर्ने उनीहरूको सुझाव छ। सरकारले आजभोलिमै निमित्त महानिर्देशक तोक्ने तयारी गरिरहेको छ।