अखिल क्रान्तिकारीले आफ्नो संगठनका नेता तथा नेपाल ल क्याम्पसका पूर्वसभापति अधिवक्ता विष्णु ढुंगेललाई सर्वोच्च अदालत जलाउने घटनामा ‘प्रमुख अभियुक्त’का रूपमा देखाइ गरिएको पक्राउप्रति कडा आपत्ति जनाएको छ।

उपत्यका विशेष प्रदेश समितिका इन्चार्ज निरोज श्रेष्ठले बिहीबार विज्ञप्ति जारी गर्दै भदौ २३ र २४ का केही तस्बिर र भिडियो क्लिप मात्रैलाई आधार बनाएर योजनाबद्ध रूपमा गिरफ्तारी गरिएको दाबी गरेका छन्।

श्रेष्ठले आएका आरोपहरूलाई अस्वीकार गर्दै वास्तविक घुसपैठ समूहमात्रै कारबाहीको दायरामा ल्याउन माग गरे। उनले भने, *“लोकतान्त्रिक अधिकार प्रयोग गर्ने विष्णु ढुंगेललगायत अन्य युवा–विद्यार्थीलाई बिनाशर्त रिहा गरियोस् । राजनीतिक प्रतिशोधका सबै रूप रोकियोस् ।”*

यसअघि पक्राउ परेका दुई जनाको बयानका आधारमै ढुंगेललाई बुधबार चितवनबाट पक्राउ गरिएको थियो। झापाका ज्योति थापा घताने र ललितपुरका सुशील ‘ब्राउन’ श्रेष्ठले ढुंगेलले उकासेपछि सर्वोच्चमा आगजनी भएको बयान दिएका हुन्।

प्रहरीले संकलन गरेको फोटो–भिडियो फुटेजबाट पनि ढुंगेल सर्वोच्च परिसरमा भीडलाई उकास्दै अगाडि देखिएको पुष्टि भएपछि उनलाई पक्राउ गरिएको जनाएको छ।

ढुंगेल अखिल क्रान्तिकारीका नेता र अधिवक्ता हुन्। उनी २०७९ सालमा ल क्याम्पसका स्ववियु सभापतिमा विजयी भएका थिए। सर्वोच्चमा आगजनीका दृश्यहरू सार्वजनिक भएपछि ढुंगेलको भूमिका चर्चामा आएको थियो।

प्रहरीले उनीविरुद्ध आपराधिक उपद्रवसम्बन्धी मुद्दामा अनुसन्धान अघि बढाइरहेको छ।